Sevilla mualah Barcelona
Zanin aṭangin La Liga khelh chhunzawm a ni leh tawh dawn a, dar 12:15 hian hmahruaitu Barcelona chu Sevilla khelmualah an lenglut dawn a, Barca thiampuipa Lionel Messi chu a inlan thei dawn nge dawn lo tih a chiang lo.
Zan dar 10:00-ah Real Madrid chu table mawng lama awm Las Palmas mualah an lenglut dawn a, pahnihna Ateltico Madrid erawh Pathianni zanah an inlan chauh ang - anni hian Deportivo an tlawh thung dawn a ni.
Messi a chiang lo
Argentina tana a feh chhuahna lamah Lionel Messi-a'n hliam tenau a tuar a, ram tan match hnih khel tura kal ni mah se khelmual chhungah a inlan lo. Messi hian Ningani khan training a zawm tawh a, mahse Estadio Ramon Sanchez Pizjuan-ah a inlan ngei a ngem tih a chiang lo thung.
Barcelona hian La Liga bakah Champions League khelh zui tur an neih avangin, manager Ernesto Valverde-a'n tun season league match 28 a khelh aṭanga goal 25 khungtu hi a chawlhtir a nih pawhin a mak hran lo ang.
Argentina captain Messi bakah midfielder Ivan Rakitic leh Luis Suarez te pawh US leh China lama zin chau an nih avangin, an inlan a nih pawhin minute 90 chhung an inkhel kher lo ang. European football lama chhawr theih rih loh Philippe Coutinho a pawimawh ang.
Valverde naute hian hneh loh nei loin La Liga season an hmang mek a, an mahni hnaih bertu Atletico Madrid aiin point 11 zetin an sang fal zawk. Barca hian April thla chhungin league match li an khel dawn, Champions League leh Copa del Rey final nen tun hnai ni 30 chhungin match riat khelh tur an nei dawn - duhthusama season khar tur chuan player siksawi thiam a ngai dawn hle a ni.
Indahṭhat hun
Real Madrid tan league nomawi beisei ngam chi a ni tawh lo a, Zinedine Zidane-a naute tan Champions League a pawimawh tawh zawk. Real hian Thawhlehni zanah Italian champion Juventus an tlawh zui dawn a, hei bakah hian Atletico Madrid nen an la inkhel zui dawn bawk, zanin hi an tan indahṭhatna hun a ni.
Zidane-a'n squad a siksawi dawn tih a chiang tawh a, kum 33 mi Cristiano Ronaldo chu Las Palmas khel turin a zin ve dawn lo. Ram tana feh chhuak langsar dang Gareth Bale leh Isco te pawhin training zawm tawh mah se chhawr rim an ni lo ang.