League Cup final ; PSG vs Monaco

Zanin dar 12:35 hian French League Cup final khelh tur a ni dawn a, champion lai Paris Saint-Germain leh an elpui ber Monaco ten nomawi an inchuh dawn a ni.

French club lian pahnih te hi nipui bazarah khan an che na dun hle, an sum chet vel dan erawh a inang lo. Player lei nan leh hralh nana club pahnihte sum hman zat hi pound maktaduai 985 vel zet a ni hial.

Ligue 1 champion Monaco hian season hmasa league nomawi chawi puitu player ṭha ṭhenkhat chu Premier League club hnenah sum tam tham takin an hralh. PSG erawhin Barcelona aṭanga Neymar lak chhuah nan chauh pawh pound maktaduai 200 an hmang a, man to taka lei turin Kylian Mbappe chu loan hmangin an hawh sak bawk.

Sum an hman hnem avangin PSG hian player an nei ṭha a, a zawna a vawi nga nan League Cup champion nih pawh an inbeisei hle. Champions League aṭanga an tlak tawh avangin an ban phaka nomawi chawi theih dang awm apiang chu chawi an duh.

Footballer manto ber Neymar chu hliam vangin a inlan thei dawn lo a, rawlthar duhawm Mbappe erawhin a club hlui a hmachhawn thei dawn thung. Kum 19 mi Mbappe hian Thawhlehni zan khan France tan goal hnih khungin Russia lakah an ram hi 3-1 in hnehna a chanpui.

Season hmasa khan Monaco hian kum 20 hnua a vawi khat nen league nomawi an chawi a, Champions League semifinal an lut bawk. Kuminah erawh Leonardo Jardim-a naute hian League Cup bak beisei an nei tawh lo.

Jardim-a naute hian season bul an ṭan fuh tawk lo a, League-ah hmahruaitu PSG aiin point 17 zetin an hniam zawk mek a, playoff khelh ngai loa Champions League khel zui turin pahnihna nih chu an tum tur a ni tawh.

Mahse, nikum December thlaa Champions League aṭanga an tlak hnuah erawh an insiamṭha tawh hle. Inelna hrang hrangah match 19 an khelhah vawi khat chiah chak loh an nei a, tun hnaiah tlawm loin match kua an kaltluang tawh bawk.