Hunthar leh Tuichangral an chak

RS Traders Pro Volleyball League khelh mekah champion lai Hunthar Vengin a vawi hnih nan hnehna an chang a, kai thar Tuchangral pawhin tualchhung volleyball inelna sang berah a vawi khat nan hnehna an chang ve bawk.

Nilaini zan R. Dengṭhuama Indoor Stadium, Mualpuia inkhelah Hunthar Veng chuan Mizo hlanga khel TNT chu inkhel inhnehtawk takah 18-25, 25-23, 25-18, 15-25, 15-11 (3-2) in an hneh hram.

Season hmasa aṭang khan TNT hian Hunthar lakah hnehna an chang thei lo, kuminah huaisen takin bei let mah se an vanneih ṭum an la tawng thei lo. Hunthar tan Ranveer chuan point 47 thawk chhuakin, vawi 24 tisual mah se a team hnehna chanpuiin LG D3 Player of the Night a tan thlan a ni.

Season hmasa nen chhiar zawmin Hunthar hian a zawnin match sarih chhung hnehna an chang tawh a, PVL bikah hnehna chang zawn rei thei ber an ni.

Ningani zan khan Aizawl khaw pawn team awmchhun Tuichangral chuan Anastasia, Electric Veng lakah 25-20, 25-18, 25-23 (3-0) a hnehna changin dai ngai loh ram an dai a, semifinal beiseina an nei thar leh ta.

Tuichangral player pawimawh Shivendar-a'n point 31 thawk chhuakin LG D3 Player of the Night atan thlan a ni a, ani bakah hian PC Lalhruaimawia leh Ramngaihsanga ten an thawhhlawk hle bawk.

Champion hmasa ber Anastasia hian match hnih khelh tawhah point an la hmu lo a, tun hma lama an ropuina ang neih let an duh a nih chuan an insiamṭhat a ngai tawh hle.

PVL hi round hnihna khelh zawh a ni tawh a, April 3 zan aṭangin round thumna khelh chhun­zawm a ni ang. Team paruk te hi an inkhelh kual vek hnuah a sang paliin semifinal an lut dawn a ni.