Djokovic hmaa ding tur Zverev

A zawnin match 16 zet a chak ta, match 17-na chu a harsa ṭalh tawh dawn - Alexander Zverev hmachhawn leh tur chu Novak Djokovic a ni. Player ṭha pahnih hian US Open final luh an inchuh dawn.

Djokovic hi mipa player zinga Grand Slam champion hnem ber nih tum a ni a, a khingpui tur erawh a vawi khat nana major title lak tum ve chauh a ni thung - an dinhmun a inthlau hle. Mahse, an intawn hnuhnung berah Zverev hi a chak!

Djokovic a khawng
Nimin zing khan New York khawpuia tennis stadium hmingthang Arthur Ashe Stadium-a inkhelah Djokovic-a'n fiahna a paltlang. World number 1 hian US Open semifinal a vawi 12 luhna ni turin Matteo Berrettini chu 5-7, 6-2, 6-2, 6-3 in a hneh.

Set hmasa berah Djokovic hian a service a hloh a, set a hloh zui bawk. Wimbledon final-a intawng tawh player an inhlau lo tawn hle. Italian tlangval Berrettini-a'n a service a hmun ṭha hle, break point pe miah loin a tlang thei.

Mahse, set hnihna aṭangin Djokovic-a'n a ze ngai a chhuah. Inkhel kal lai a ti muang a, hun pawimawh laiah chat zel a khingpui service a chhuahsak thei. Set hnuh nung pathumah Serbian star hian a service a hloh zui tawh miah lo, darkar thum leh minute 26 chhungin a chak.

Kum 34 mi Djokovic chuan, "Inkhel hautak tak a ni, raksa leh rilru a hah duh hle. Matteo hi player ṭha tak a ni a, kan inkhelh tawhnaah kan in chai tawk thei hle," tiin a sawi. Novak hian Italian player hrim hrim a hmachhawn tawhah vawi 44 a chak a, ṭum thum chauh chak loh a nei.

Roger Federer (20 titles) leh Rafael Nadal te khum tumtu hian Grand Slam bikah match 26 a chak zawn tawh. Australian legend Rod Laver (1969) hnua season khat chhunga major title pali kawl kim leh theitu nih a tum mek a, match hnih chak a la hmabak.

Tihsual a thiang lo
Alexander Zverev-a'n South African tlangval Lloyd Harris chu 7-6, 6-3, 6-4 a hnehin semifinal a lut a, tun hnaiah a zawnin match 16 a chak ta - quarterfinal match bika winners vawi 43 a vuak chhuah hi Djokovic tan lo chhinchhiah a fin thlak ang.

German tlangval hian a vawi khat nan Grand Slam champion a beisei ve a, mahse a hmachhawn leh tur hi seeded pakhatna Djokovic a nih miau avangin a hma hun a chiang lo ta hle, seeded pangana Zverev hian hnehna chang tur chuan tihsual neih a thiang lo tih a sawi.

Kum 24 mi Zverev chuan, "Novak nen kan inkhel dawn a nih chuan ka ṭhat dan bera ka khelh chhuah a ngai tihna a ni. A hmaah chuan tihsual neih a rem dawn lo, tihsual kan nei zeuh a nih chuan kan chak lo a ni nghal mai, a bik takin unforced error neih tlem a ngai," a ti.

Zverev leh Djokovic te hi Tokyo Olympic-ah khan an intawng a, chak tura rinkai Novak hi 1-6, 6-3, 6-1 in a chak lo. A chak loh vang hian 'Golden Slam' nih a tumna a thamral a, tunah 'Calendar Slam' nih a tumna hi Zverev lakah bawk a thamral leh theih dan a awm.

Player pahnih hi tun hmain vawi kua an inhmachhawn tawh, record nei ṭha zawk Djokovic-a'n vawi ruk hnehna changin ṭum thum a chak lo thung. Season hmasa US Open finalist Zverev tan tun ṭuma a match khelh tur hi fiahna lian ber ang hiala sawi theih a ni ang.