Emma Raducanu mumang a la tawp lo

British tleirawl hmelṭha, tennis a khelh thiam vanga mite ngainat hlawh tak Emma Raducanu chuan US Open khelh laiah beisei phak baka result ṭha a nei chhunzawm zel - tunah zet chuan semifinal hial a thleng ta.

Nilaini zan khan Raducanu hian a khingpui Belinda Bencic chu 6-3, 6-4 in a hneh. Tokyo Olympic champion laka hnehna chang tur hian darkar khat leh minute 22 bak hun a mamawh lo - final lut tur chuan Maria Sakkari a hneh leh a ngai dawn.

Mumang ram
Wimbledon-ah khan khawvel a barakhaih tawh a, an ram a nih vang leh grass court-a khelh a ni avangin mipui rin erawh a la hlawh lo. World number 150 a nih avangin Raducanu tan US Open hi qualifier aṭanga khelh a ngai.

Tunah chuan set hloh miah loin a thiam pali zingah a tel thei ta, world ranking chhuak tharah chuan a sang zual 50 zingah a tel phak dawn - Grand Slam tournament a khelh vawi hnihnaah a sulhnu hian sawi zui a hlawh ta hle - a champion lo ang tih a sawi theih ta lo.

Flushing Meadows-ah hian qualifier aṭanga inlan zingah semifinal lut thei awmchhun a la ni a, semifinal luh china a lawmman dawn tur pawh £490,000 (Rs 4,97,07,613) a tling, kumin tir lama a nun nen chuan a danglam ta hle.

Hmabak Sakkari
Quarterfinal inkhel dangah Maria Sakkari chuan seeded palina Karolina Pliskova chu 6-4, 6-4 in a hneh ve thung, player ṭha leh rinkai zawk te an tla zel a, Greek player zingah Sakkari hi US Open semifinal in vaw kai thei hmasa ber a ni hial.

Seeded 17-na Sakkari hian tun hmain major tournament a lo khel fo tawh, sang tak erawh a thleng ngai lo. Semifinal-a a hmachhawn tur Raducanu aiin tawnhriat nei hnem mah se inelna lian bikah chuan sulhnu chhuan tur a nei bik lo, pakhat zawk chuan dai ngai loh ram an dai chhunzawm dawn.

Kum 26 mi Sakkari chuan, "Sawi mai tur pawh ka hre lo, quarterfinal paltlang meuh chu a lawmawm hle. Ka kum ngaihtuahin ka tana hun ṭha ber niin ka hria a, chuvangin a tawp thleng ṭan tlang ka tum ang," tiin a sawi.