Three Lions lawm lohna thlentu 'hun pek belh'

England-in World Cup qualifier match ruk an khelhah an chak vek dawn emaw an inti hman a, mahse, hun pek belha Damian Szymanski goal khung vangin Poland nen 1-1 in an inhnehtawk.

Warsaw khawpuia inkhelah England tan Harry Kane chuan minute 72-naah goal a khung a, Tottenham Hotspur striker goal khung hi inkhela goal lut awmchhun ni tur awm angin a lang hman.

Mahse, hun pek belh minute hnihnaah bench aṭanga luhtir Szymanski-a'n danglamna a thlen a, point thum nena haw mai tura inngai England lawm lohna thlenin si phurh sutna goal a khung.

Three Lions hian match rukah point 16 neiin hma an la hruai tho a, an hnuai chiaha awm Albania nen khelh zat inangah point liin an la inthlau - chak zo lo mah se World Cup an hnaih viau e.

Kane = class
England leh Poland inkhelh hmain Harry Kane leh Robert Lewandowski intawng tur chuan sawi a hlawh a, Bayern Munich striker Lewy-a te rama langsar hmasa zawk erawh Kane a ni.

First half-ah team pahnihin goal an khung lo a, kum 28 mi Kane hian goal khung turin minute 70 chuang a nghah a ngai. Mahse, a hun a thlen meuh chuan Kane-a'n ṭha zetin a khung a, Polish keeper ṭha Wojciech Szczesny-a'n tih theih a nei lo.

Kane hian World Cup leh Euro qualifier match 15 zet chu a zawnin goal a khung ta a, tun international break-a match thum an khelhah pawh goal a khung vek - ram tan match 64 khelin goal 41 a khung tling der.

Tottenham Hotspur striker Kane hian England tana goal khung tam lamah pangana dinhmun a hauh der a, Three Lions tana match 120 a khelha goal 53 khungtu Wayne Rooney-a record a hnaih ta hle - kum 28 chiah a la ni tih theihnghilh loh a ṭha.

A tawpah Lewy
Mahni mualah Poland-in England an ngam lo dawn niin a lang hman a, a bik takin hming langsar leh en rawn hlawh Lewy tan a tlawm 'thlak' ang - England tlarhnungin Bayern striker hi an veng hneh a, chance a nei meuh lo.

Hun pek belhah erawh England-in Lewy an dang reng thei lo. Kum 33 mi striker hian goal khung lo mah se a siamsaktu tala ṭan a duh a, hun pek belh minute hnihnaah Szymanski khung tur a siamsak.

Lewy hian AEK Athens midfielder Szymanski-a khung tur hi duhthusama ṭhain a cross a, Luke Shaw aia zuang sang zawk Szymanski-a'n a tauh lut - hun a tawp zui a, 1-1 in team pahnih an inhnehtawk.

Khawvela number 9 ṭha ber ang hiala tam takin an ngaih Lewandowski hian tun season-ah Bayern tan match li khelin goal sarih a khung tawh a, England lakah goal khung lo mah se tun international break-a an match hmasa pahnihah goal thum a khung hman.

Lewy = Respect
England-in Hungary nen an inkhelh ṭumin chi inthliarna lam hawia tih elna an tawk tawh a, Poland lakah thawnthu a danglam tam lo hle.

England hnam hla sak a nih tirhin fans tam takin an au el a, mahse, Poland keeper Szczesny-a'n fan-te chu ngawi tura a ngen hnuin kut bengin Three Lions hnam hla hi fan-ten an lawm leh ta zawk.

Mahse, Polish fan-te an insum rei lo - vunrawng inhmuhsit duh lohna lantir nan England player-te an ṭhingṭhi a, Poland fans lamin an lo au el.

Lewandowski chuan an jersey bana 'Respect' (Zahna) tih inziak chu kawkin fan-te chu ngawi turin a ngen a, an mikhual laka 'zahna' lantir turin a ti - Polish player senior pahnih chet dan hian fak a hlawh a, fan-te chet dana Polish FA chunga hremna lekkawh tura ngenna thawm a ri ring viau bawk.