ITM University Badminton Academy-ah Mizo naupang

Mizoram Badminton Association (MBA) leh TATA Trusts ṭangkawp chuan ITM University Badminton Academy, Raipur-a zir tur thlanna Nilaini khan an nei a, Mizo naupang 11 an thlang chhuak - lehkha zirtir nghal an ni dawn.

Kulikawn YMA Hall, Aizawlah coaching kal tur Mizo player-te thlanna hi neih a ni a, he hunah hian chief national junior coach Sanjay Mishra leh coaching staff dang pahnihten Mizo naupangte thlanna hi an nei a, category hrang hrangah naupang 11 hi thlang chhuakin, Under-13 leh Under-17 inkara khel tur an ni hlawm.

MBA chuan ITM University-a inzir tur badminton player-te chu duhsakna an hlan a, "Mizoramah badminton-in hmasawnna a hmu chho zel a. India ram piah lamah, international level thlenga lang pha thei turin hma kan la zel a ni," an ti bawk.