Record ropui nen Italy-in goal an surtir

European champion Italy-in record thar an siam - Nilaini zan khan World Cup qualifier-ah Lithuania chu 5-0 in an sawp a, national team zinga match 37 tlawm loa kaltluang hmasa ber an ni.

Italy tan rawlthar duhawm Moise Kean chuan Everton-ah hlawhchham mah se beisei tur a la nei tih pholangin goal hnih a khung a, Giovanni di Lorenzo leh Giacomo Raspadori ten goal khat ve ve an khung bawk.

Azzurri-in goal khung pui mamawh lo mah se Lithuania defender Edgaras Utkus chuan an lamah a ti lut a, hun a tawp meuh chuan 5-0 in Italy an chak - group C-ah point 14 neiin hma an hruai mek.

Italy hian record thar siam mah se tun international break-ah Lithuania an tawn hmain match hnihah goal khat chiah an khung a, Bulgaria (1-1) leh Switzerland (0-0) an inhnehtawkpui - a tawpah goal an khung ṭawk a, a tuartu chu Lithuania an ni.

Kean beiseina
Moise Kean-a'n kum 2019 khan Juventus aṭangin Everton a pan a, a man ringawt pawh euro maktaduai 30 thlenga sang chho thei tur a nih avangin a chungah beiseina a sang hle.

Mahse, Everton-ah beisei a phak lo a, season hmasa phei chu Paris Saint-Germain-ah loan-a kaltir a ni - French club tan match 41-ah goal 17 a khung a, Everton-ah kir mah se boss thar Rafael Benitez-a'n mamawh a inti lo.

A club hlui Juve-in an player beiseiawm ni ṭhin chhan chhuak turin an ban an phar a, Italian club-ah loan-in a kir. Serie A lamah match khat pawh a inlan hmain Roberto Mancini-a'n duhsak takin a ko a, a pu rinna hi goal hnihin a chhang - ram tan match 10 a khelhah goal li a khung ta.

A vawi khatna
Italy tana goal khungtu dang Lorenzo, Raspadori leh Utkus ten Italy tana an goal hmasa ber an khung ṭheuh a, Belgian top flight club Cercle Brugge tana khel mek Utkus erawh Lithuania player a nih avangin a lawm lo ang!

Kum 21 mi Giacomo Raspadori-a'n ram tan match nga a khelha a goal hmasa ber a khung a, Sassuolo forward hi Euro-ah khan koh ni mah se group stage-a Wales an khelh ṭumin bench aṭanga luhtir a nih bak a khel lo - Lithuania 'own goal' chu a 'shot' Utkus-a'n an lama a lo dan luh a ni bawk.

Euro 2020-a Italy tana feh chhuak Di Lorenzo-a'n tawnhriat nei ṭha viau mah se ram tan goal a la khung ngai lo a, Lithuania laka a goal khung kha Italy tan match 15-a khelha a goal hmasa ber a ni.

A chiang e!
Italy-in goal khung loa Switzerland an inhnehtawkpui khan international football-a a zawna match 36 tlawm lo awmchhun record an siamah ngaih a ni a, mahse, Brazil chuan 1993-96 inkar khan match 36 chhung a zawna an tlawm loh thu sawiin an pawm lo a, Italy chu record chelhtu bik an nih loh thu an sawi.

Mahse, Brazil hian 1993-96-a match 36 a zawna an tlawm loh hian a karlakah Romania B team an tum a, tam takin Italy record nen huang khatah an dah lo.

Nilaini zanah Italy-in Lithuania an sawp a, sawisel theih loh record an siam ta - match 37 a zawnin an tlawm ta lo a, record thar a ni. Match 37 chhung hian vawi 28 an chak a, vawi kua draw an nei.