Mizo fighter-ten Indian Open MMA hmachhawn dawn

Indian Open MMA Championship chu vawiin aṭang hian Indore, Madhya Pradesh-ah neih a ni dawn a, Mizoram State Mixed Martial Arts Association (MISMA) chuan he huna tel tur hian fighter pathum an tir.

September 12 thlenga inelna neih turah hian George Lalmuanawma, Zarmawia leh Joseph Vanlalhruaia te chu Mizoram aiawha fehchhuak an ni a, nimin khan Lengpui aṭangin Indore lam hi an pan. Covid-19 vanga inkharkhip vangin duh angin Mizo fighter-ten training an nei thei lo a, mahse, MISMA chuan thla khat chhung training camp an buatsaih hman thu an sawi.

Chite tlangval Zarmawia hi national champion lai niin amateur MMA-ah tlawm a la nei lo a, Mizoram sports minister Robert Romawia Royte chuan kumin chhung atan a personal training fee a tumsak.

Indian Open hi November, 2021-a International Mixed Martial Arts Federation (IMMAF) hnuaia MMA World Championship-a India aiawh tur thlanna a ni nghal dawn a, MISMA chuan Kazakhstan-a neih tur inelnaa tel thei tur khawpa result duhawm nei turin a fighter-te chu duhsakna a hlan.

IMMAF hi khawvela MMA pawl lian ber a ni a, MMA professional company lian ber UFC nena thawk dun niin an hnuaia international medallist te chu professional company lian tak taka an luh theih dan tur an buaipuisak zui ṭhin a ni.