Nice point hmuh sa an paihsak

Inkhelh laia buaina a chhuah avangin Nice leh Marseille chungah hremna lekkawh a ni a, point thum hmu thei dinhmuna ding hman Nice chu an point hmuh paihsak an ni.

Nice hian an mikhual Marseille lakah 1-0 in hma an hruai reng a, chak tlanga point thum hmu tura ngaih an ni hman. Mahse, hun tawp hmain Dimitri Payet-a corner pet tur chu fans lamin tui bottle hmangin an vawm.

Payet-a hian tui bottle chu fans lamah vawm letin buaina a chhuak zui a, hun rei tak an buai hnuah Nice lamin khelh zawm duh mah se Marseille an inlan zui duh tawh lo - thuneitu sang Ligue de Football Professionnel (LFP) a inrawlh a ngaih phah.

Nice leh Marseille te match hi khelh ṭhat tur a ni dawn, buaina chhuah chhan Payet chu match khat khel thei lo tura hrem a ni a, a teammate buaina chhuah laia phusa tak Alvaro Gonzalez chu match hnih khel thei lo turin an hrem bawk.

Mualneitu Nice hi an khelh hmabak paliah a hmuna entu an nei thei dawn lo a, fans zinga tui bottle vawm luttu chu club-in man chhuak tura tih a ni a, a chungah hremna lekkawh a ni bawk ang.