Kosovo ngamtu Spain-in World Cup khelh an tum

Spain-in World Cup 2022 khelh ngei an tum tih chu khelmualah an pholang zel a, Nilaini zan khan khualmualah Kosovo chu 2-0 in an hneh.

West Ham midfielder Pablo Fornals chuan Premier League-a a chet ṭhat chu Spain tan a chhunzawm zel a, minute 32-naah goal hmahruai a khung - ram tana a bul ṭan vawi khatnaah goal a khung nghal!

Fornals hian Kosovo hma hian ram tan match thum a lo khel ve tawh a, mahse, bench aṭang vekin a lut. Luis Enrique-a'n Kosovo lakah a rinzia pholangin bul a ṭantir a, a pu rinna tihlawhtlingin goal hmangin a chhanglet.

June 2019-a pound maktaduai 24-a Villarreal aṭanga West Ham zawmtu Fornals hian Premier League-a a match hnuhnung paliah goal li a khung a, assist vawi khat a nei bawk.

Spain goal khat dang hi Ferran Torres khung a ni a, Manchester City forward hian hun tawp nan minute hnih chauh a awm tawh tihah an goal hnihna hi a khung.

Kum 21 mi Torres pawh hian Premier League a pan hnuah hma a sawn hle. Season hmasaa City a zawm hma khan Valencia tan inelna hrang hrangah match 97 khelin goal khat chiah a khung.

Hei vang hian Pep Guardiola-a'n a lakluh pawh khan ringhleltu an awm. Mahse, City-a a season hmasa berah match 36 khelin goal 13 a khung a, assist vawi thum a nei bawk.

Tun season-ah league match li khelin goal hnih a khung leh der tawh a, assist vawi khat a nei bawk - Spain tan chanchin lawmawm a ni.

Spain-in match ruk an khelh aṭangin point 13 an nei tawh a, group B-ah hma an hruai mek - anmahni hnaih bertu Sweden chuan match li an khelh aṭangin point kua an nei.

Sweden hi Greece lakah 2-1 in an tlawm a, Greece hian Anastasios Bakasetas leh Vangelis Pavlidis hmangin goal hnih an khung hmasa a, Sweden tan Robin Quaison chuan minute 80-naah chhanglet mah se a team a beng harh zo lo.