Ka lungawi takzet - Germany coach

Nilaini zan khan Germany-in World Cup khel tur zawnnaah Iceland 4-0 in an hneh a, Die Mannschaft-in Hansi Flick hnuaia an match hmasa pathumah hnehna an chang vek.

Reykjavik-a inkhelah hian Germany tan Serge Gnabry (4'), Antonio Rudiger (24'), Leroy Sane (56') leh Timo Werner (88') ten goal khat ṭheuh an khung. Inkhelh banah Bayern Munich manager hlui Flick chuan an khelh danah a lungawi thu a sawi.

Goal li
Hansi Flick-a'n Armenia 6-0 a an hneh ṭuma player-te a ring nawn a ni ber a, inhliam vanga khel thei lo Marco Reus aia Ilkay Gundogan a luhtir tih loh chu a ngai vek a hmang.

Germany tana hna a awlsam nan Gnabry-a'n minute lina lekah a khung a, goal luh theih nan Bayern Munich tanaa khelhpui player pathum Niklas Sule, Joshua Kimmich leh Sane te an ṭangkai hle.

Chelsea defender Antonio Rudiger-a'n minute 24-naah Kimmich-a freekick chu mawi zetin a tauh lut a, Germany-in 2-0 in hma an hruai. Iceland an insiamṭha a, Johann Berg Gudmundsson hmangin ṭum hnih chance an nei a, Burnley winger goal ban pet per chu Albert Gudmundsson-a'n khung mah se offside vangin pawm a ni lo.

Germany an insiamrem thuai a, Sane leh Wener te hmangin an khung belh. Flick-a hote hi an vanneih ṭum chu ni se, goal tam zawk khung thei tur an ni. Leon Goretzka goal khung chu offside vangin pawm a ni lo a, Werner-a'n goal ruakah a pet over. Inkhel thununtu Flick-a hote 4-0 in an chak.

Hmasawnna chu
Joachim Low kaihhruaina hnuaiah Germany-in match thum an khel hman a, an mualah Iceland 3-0 in hneh a, Romania 1-0 in hneh leh bawk mah se North Macedonia lakah 2-1 in an chak lo.

Euro 2020 zawh aṭangin Flick-a'n Germany a enkawl ṭan a, Bayern Munich vanglai ang maiin an goal bawh a na hle. Germany hian Liechtenstein (2-0), Armenia (6-0) leh Iceland (4-0) lakah goal 12 an khung a, goal an chuah lo. Hei aia pawimawh zawk chu khelh dan phung nghet an nei bawk.

Low-a'n a enkawl laiin group F-ah Germany hi ram ṭha satliah an ni ringawt a, tunah erawh an ṭha fal ta hle. Flick-a hoten hian match thumah point kua an hlawhchhuah avangin Germany-in match ruk aṭangin point 15 an hlawh chhuak a, anmahni hnaih bertu Armenia aiin point liin an sang zawk.

Flick a lawm
Germany coach Hansi Flick chuan, "Training-na hun ṭha kan nei hman lo chungin point kua kan hmu a, kan football khelh dan hmang a dik bawk. Kan ṭhat theih dan ber turin kan la khel lo a, chu erawh tunah chuan beisei chu a ni rih lo. Kan khelh danah ka lungawi takzet," tiin a sawi.

Captain Manuel Neuer pawhin, "Result ṭha neih hi a pawimawh hmasa a ni. Khelmual chhungah football mawi ber la khel lo mah ila, kan khingpuiten kan tlarhnung an ti buai pha lo a, inkhel kan thunun bawk. Tun ṭuma kan match thum khelhna hi in lo zirchiang a nih chuan hma kan sawn tih inhmu ang," tiin a sawi.