Man United fan an zin thei dawn

Europe-a club inelna sang ber UEFA Champions League chu karleh aṭangin khelh ṭan a ni dawn a, Manchester United-in Thawhlehni zan dar 10:15-ah Young Boys hmachhawn turin Bern-ah an zin ang.

Switzerland ram dan avangin Young Boys-in Man United ṭantu hnenah ticket pek an tum lo a, amaherawhchu Man United thuneitute nen an indawr ṭhat hnuah an zin thei dawn.

United Kingdom huam chhung tana National Health Service-in Covid-19 vaccine la tawhte tana certificate an pek chhuah chu tualchhung thuneitute an pawm lo. Hemi a nih avang hian stadium bulah Covid-19 test-na siam a ni ang a, heta negative te chauh hian inkhel an en thei dawn a ni.

Man United ṭantute tana Covid-19 test hun hi Thawhṭanni leh Thawhlehniah hawn a ni ang a, test man hi £50 aṭanga £60 tur niin darkar hnih vel nghah a ṭul dawn.

Young Boys lam hian Man United ṭantute tan ṭhutna 1,800 an zuahsak ang. Ole Gunnar Solskjaer-a hote hi group F-ah Villarreal, Atalanta leh Young Boys te nen an awm.