Pathumnaah Gold Cup champion United States

Confederation of North, Central American and Caribbean Association Football (CONCACAF)-in World Cup-ah quota pathum an nei a, inter confederation playoff hmangin ram pakhat tan khelh theih dan a awm bawk. September thla international break aṭangin CONCACAF World Cup khel tur zawnna final round hi khelh ṭan a ni.

Nimin zing khan United States chuan Honduras 4-1 in an hneh a, match thum khelhah tlawm nei lo mah se an match hnuhnung berah chauh hnehna an chang. US hian Gold Cup khelh zawh takah khan final-ah Mexico 1-0 a hnehin an champion a, amaherawhchu World Cup hnuhnung berah an tel pha lo.

US an ṭha
United States-ah sum a tam a, football aiin basketball, American football leh ice hockey te tui mah se football-ah pawh nasa takin hma an sawn. Club inelna sang ber Major League Soccer-in hma a sawn a, player-te hma an sawn zel a, Europe-a khel player ṭhahnem tak an nei bawk.

Olímpico Metropolitano-a Hunduras an hneh ṭum hian US tan Antonee Robinson (48'), Ricardo Pepi (75'), Brenden Aaronson (86') leh Sebastian Lletget (90+3') ten goal an khung.

Inkhel bul ṭantu zingah Christian Pulisic pawh a tel a, chutihrualin Covid-19 vangin an ṭhat theih dan berin an la inlan lo zawk. Coach Gregg Berhalter hian duhthlan tur player a ngah hle.

Manchester City keeper Zack Steffen an kawl a, player hmabak nei êng zinga chhiar tel Giovanni Reyna (Borussia Dortmund), Weston McKennie (Juventus), Chris Richards (Bayern Munich), Tyler Adams (RB Leipzig), Sergino Dest ( Barcelona) leh Josh Sargent (Norwich City) te an neih avangin World Cup an khelh phak a nih chuan team hmuhnawm zinga mi an ni thei ang.

Team dang
United States hming langsar mah se qualifier-a hmahruai mektu chu Mexico an ni rih. El Tri hian Jamaica 2-1 a an hnehin bul an ṭan a, Costa Rica 1-0 in hneh leh mah se Panama nen 1-1 in an inhnehtawk.

Mexico hian Gold Cup final-ah US hneh lo mah se hemi rual chiaha khelh Olympic-ah semifinal an thleng a, veteran keeper Guillermo Ochoa pawh Tokyo-ah a zin zawk.

US leh Mexico elpha thei tur zingah Canada an tel a, Bayern Munich defender Alphonso Davies telna team hian point nga an hmu tawh. Vanduaithlak takin Davies hi US nen 1-1 a an inhnehtawk ṭumin hliam vanga lakchhuah a ni.