A hmawr bawk tur Fernandez leh Raducanu

US Open 2021 hmeichhe singles champion thar kan hmu dawn. Sulhnu ṭha leh chhuan tur nei tam lo pahnih khan huaisen takin inelna an hmachhawn a, tunah chuan a hmawr bawktu tur an ni tawh - Inrinni zan dar 1:30 hian Emma Raducanu leh Leylah Fernandez ten final an khel ang.

British tleirawl Raducanu hi kum 18 mi chauh a la ni a, set hloh miah loin final a lut; a khingpui tur Canadian Leylah Fernandez pawh kum 19 mi chauh a la ni. Kum 1999 hnu lamah kum 20 tling lo pahnihin Grand Slam final an khelh leh vawi khatna a ni dawn.

American legend Serena Williams (kum 17) leh Swiss legend Martina Hingis (18) ten 1999 khan major tournament final an lo khel dun tawh, anni pahnih sulhnu chu Raducanu leh te hian hun rei tak hnuah an rawn chhui ve leh dawn chiah tihna a ni.

Hlauh nei lo
Hmanni mai kha a la ni, Wimbledon khelh hma khan Raducanu hi world number 338 a ni - grass court inelna lianah khan khawvel a barakhaih. World number 150 ni chungin US Open a khel a, tunah chuan qualifier aṭanga inlan zinga Grand Slam final khel hmasa ber a ni dawn ta.

Nimin zing semifinal inkhelah Raducanu hian seeded 17-na Maria Sakkari chu 6-1, 6-4 in a hneh a, hnehna chang tur hian darkar khat leh minute 24 bak hun a mamawh lo - final thleng tur hian set hloh miah loin a khingpui zawng zawng a hneh vek!

Raducanu chuan, "Hetiang anga hma hian Grand Slam final ka thlen mai pawh hi ka ring phak bik lo. Ka tan chuan New York khawpuia inkhelh hi a nuam a, stadium hmingthang Arthur Ashe Stadium-a inkhelh ringawt pawh thil mak a la tling zel.

"Mite chuan record hrang hrang ka siam thute min hrilh, kei chuan ngaihlu viau mah ila record hi ka ngaih pawimawh ber a ni rih lo, nuamti leh eng thawl taka tennis khelh hi ka duh ber chu a ni," tiin a sawi a, record a ngaihsak lo a nih pawhin mellung pawimawhin a umzui zel dawn.

British player zingah tun hnai kum 62 chhunga Grand Slam final lut thei naupang ber a ni a, Virginia Wade (1963) hnu lamah British nula US Open khel leh thei hmasa ber a ni dawn bawk, a chanchin hian Britain mai bakah khawvel a chiah hneh hle.

Hmabak Fernandez
Khawvelin Raducanu chanchin a ngaihven a, thil mak a ni lem lo. Mahse, a khingpui tur Leylah Fernandez pawh hi sawi nep theih a ni lo. Canadian tleirawl hian champion tura rinkai ni phak, seeded pahnihna Aryna Sabalenka chu 7-6, 4-6, 6-4 in a hneh.

World number 73 daih ni mah se Fernandez hi a che 'Bon' mep mep hle. Final thleng tur hian a kawng a awlsam lo, Sabalenka hma hian champion lai Naomi Osaka leh seeded pangana Elina Svitolina te a lo hneh tawh bawk.

Player thawmna leh langsar tak ni lo mah se Raducanu hi a dawhthei a, thawk leh khata point hmuh nghal pawp pawp ai chuan rei deuh tak nghah pawh a duh zawk - semifinal pawh darkar hnih leh minute 21 an khel a, a hmanhmawh duh lem lo.

A tihsual vangin a khingpuiin point 23 chauh a hmu, chak lo Sabalenka erawhin unforced errors ṭum 52 zet a nei thung. A dawh theihna hi Raducanu lakah pawh a hmachhuan leh tur a ni dawn, final hmuhnawm tak a beisei ngam ang.

Fernandez chuan, "Kum tin maiin Grand Slam khelh tumin ka bei ṭhin, mite angin ka la bei rei lo chu a ni mai thei. Amaherawhchu, ka phak tawkah thi leh thau pawlhin ka bei ve ṭhin a, tunah chuan a hmawr bawk theihna remchang ka nei ta," tiin nomawi chawi a tum ruh hle.

Mipui lawm hlawh
Stadium chhunga inkhel entuten Emma Raducanu hming an lamri nasa a, a service dawn lai thlengin autu an tam - chair umpire in mipui ngawi tura a ngen chang a awm fo reng a ni, final-ah pawh ṭantu a ngah leh dawn tih a chiang.

Mipui beisei i phak dawn em? tia an zawhna chhangin Raducanu chuan, "Min beisei ve dawn em ni? kei chu qualifier paltlanga inlan ve mai chauh ka ni a, ka lakah tumahin beisei an nei lo ang, ka tan chuan hlauh tur engmah a awm ve lo," tia a chhan lai chuan mipui thawn a ṭha hem hem hle.

Racket a humna kut phah sa a chhem dai zauh zauh te, inringtawk taka a service lai leh theih tawpa a tlan hram hram laite chuan mipui lawm a hlawh. Media nei chak ber Brtish aiawhtu a nih bawk avangin a chanchin hi duh aia tam kan le hre chhunzawm dawn niin a lang.

Mipa Singles Final
Nizan leh tukin khan mipa singles semifinal khelh a ni a, result kan ziak hman lo. Final hi Pathianni zan dar 1:30 aṭangin Star Sports-ah an live leh ṭan ang, inkhel en tur tan chuan men rei emaw thawh hma viau emaw huam a ngai dawn.

World number 1 Novak Djokovic-a'n final lutin a champion thei a nih chuan, major title 20 a neih sa tawh avangin Roger Federer leh Rafael Nadal te khumin Grand Slam champion hmasa ber a ni ang. Final khel thei dinhmuna ding player dang - Alexander Zverev, Daniil Medvedev leh Felix Auger Aliassime te erawh Grand Slam la champion ngai lo an ni a, an champion hlauh a nih chuan an tan mellung pawimawh bik a ni dawn.