Pele chunga leng Lionel Messi

Lionel Messi chuan Bolivia lakah hattrick siamin ram tana goal khung hnem lamah Pele a khum ta. Argentina captain hian ram ran goal 79 a nei tling ta chiah - South American player zinga record nei ṭha ber a ni nghal bawk.

Nimin zing World Cup qualifier inkhelah Argentina hian an mikhual Bolivia 3-0 in an hneh a, an ram khawpui Buenos Aires-a stadium hmingthang Monumental Stadium-ah ngei mai Copa America champion an nih an lawm chhunzawm bawk.

Messi-a Show
Argentina lamah an player ṭha ṭhenkhat chhawr thei tawh lo mah se buaina an nei lo. Minute 14-na lekah Messi-a'n amah vengtu defender Luis Haquin kap karah ball a khungsak a, a hnungah defender pathum la intlar mah se an inrin hmain box pawn aṭangin a pet thut.

Keeper Carlos Lampe a rawn pen chhuah miau avangin Messi-a ball pet hi dan theih a ni lo, goal kilah tak a kal avangin a harsa bawk. Ram tana Pele goal khung a nih rualna goal hian nakin thlengin sawi zui a la hlawh chhunzawm ang.

Barcelona captain hlui hian Angel di Maria nen Bolivia defender nasa taka an chhaih buai hnuah hun remchang a insiam leh a, mahse goal ban hrulah a kal. Box chhunga Lautaro Martinez nen rang taka ball an inpek kual hnuah Messi hian a goal hnihna a khung leh ta tho.

Inter Milan striker hian Messi khung tur a siamsak hma hian Di Maria siamsak a khung a, mahse offside vangin an pawmsak lo. Hun tawp hma deuhin Messi bawkin keeper Lampe-a ball dan per chu hnai tak aṭangin a khung a, an ramah an chak chiang hle.

Hun lawmawm
Argentina tana match 153 a khelh aṭangin Messi-a'n goal 79 a khung a, an ram record mai bakah South America record a ni bawk - Brazil forward Neymar-a'n ram tan match 113 aṭangin goal 69 a khung ve tawh bawk.

Goal a khung avangin a lawm a, a lawmna tak erawh an ram tan nomawi a chawi pui tawh vang a ni. Copa America an champion-na hmun kha Brazil a ni a, tunah chuan an ramah ngei hattrick a siam hnuin mipui 20,000 pungkhawm hmaah an champion kha an lawm.

Kum 34 mi Messi chuan, "Hetiang hun tawng tur hian duhthu ka sam ṭhin, a taka a lo thlen tak avangin Pathian chungah ka lawm takzet. Hetiang taka duhsakna leh hmangaihna hi ka tan a hlu, hriatreng tawh tur thil a ni," tiin a sawi.

Sourh America World Cup qualifier-ah Argentina hi pahnihna an ni mek, match riat khelh tawh china chak vek Brazil chuan point 24 hmuin hma an hruai. La Albiceleste hian point 18 an khawl khawm ve tawh thung.