India leh England inkhel tur an ṭhulh

Cricket ngainatute ngaihven India leh England te khelh hmabak fifth Test chu Covid-19 vangin ṭhulh a ni. India coaching staff zingah Covid-19 vei an awm a, a darh zel hlauh avangin inkhel pawimawh tak hi an ṭhulh.

The England and Wales Cricket Board (ECB) chuan, "Fan-te leh kan thawhpuite chungah ngaihdam kan dil. He thil thleng hian nghawng lian tak a nei a, pawi kan ti hle," tiin an sawi.

ECB hian an thuchhuah hmasaah India hian final Test hi an ṭhulh a nih chuan team pahnih hi series-ah 2-2 in an inhnehtawk ang, tiin thuchhuah an siam. Men in Blue hian tun dinhmunah 2-1 in hma an hruai mek a, result awm dan tur hi tihchian a la ni lo.

Board of Control for Cricket in India (BCCI) chuan, "BCCI leh ECB inkar boruak a ṭha a, Test match khelh hmabak khelh dan tur hi zawn a ni ang. Ram pahnihin inkhel kaltlangpui dan tur ngaihtuahin theihtawp an chhuah a, India team chhungah Covid-19 a darh avangin khelh zui a rem ta lo. BCCI chuan engtik lai pawhin player himna a ngai pawimawh a ni," tiin thuchhuah an siam thung.

Fourth Test-a India-in hnehna an chan ṭum khan mikhual team coaching staff ṭhenkhat an positive. Head coach Ravi Shastri a positive a, bowling coach Bharat Arun, fielding coach Ramakrishnan Sridhar leh physiotherapist Nitin Pate te nen inkhung hran a ṭul phah.

Ningani khan Covid-19 test neih leh a ni a, backroom staff zingah positive an awm. India hian Ningania training an ṭhulh a, chutihrualin Covid-19 test hnuhnung berah player zingah positive an awm lo.

Fifth Test hi nimina khelh ṭan tur kha a ni a, inkhelh ṭan hma darkar hnih la awmin an ṭhulh. Old Trafford-a inkhel tur hian ngaihven a hlawh a, ni hmasa pathum atan 22,000 ticket chu an hralh zo vek a, ni lina mi tur 13,000 ticket an hralh tawh bawk.

England hian nikum December thla khan South Africa nena ODI match an khelh tur chu Covid-19 hlauh vangin an ṭhulh. Fifth Test khelh hmabak erawh September 19-a Indian Premier League khelh chhunzawm a nih dawn avangin a hun sawn a harsa ang.