Leicester khelmualah harh tharna chang City

Manchester City season bul ṭan dan a duhawm lo hle - Community Shield-ah chak tura rin hlawh zawk an ni chungin FA Cup champion Leicester City chu 1-0 in an ngam lo.

Zanin dar 7:30-ah team pahnih an intawng leh dawn a, Premier League season ṭantir chauh la ni mah se match thum khelhah vawi khat ve ve an tlawm fel der tawh avangin inkhel boruak a 'hot' loh ring suh.

Team pahnih inkhelhna tur hmun hi King Power Stadium a ni a, Foxes-in chak nawn an beisei a nih pawhin mahni muala khel tur an nih avangin dem theih an nei lo.

Chutihrual chuan season ṭan nana an hneh City leh zanina an hmachhawn tur City chu an danglam tawh a, Pep Guardiola nauten chak tumin Leicester khelmual an pan ang.

A harsa dawn
Premier League club-ten UK sorkarin Covid-19 avanga 'red list' zinga a dah ramah inkhel turin an player-te an chhuah phal lo a, ramin player a koh loha an chhuah loh chuan FIFA-in hrem theihna dan a nei.

Club-te thutlukna avangin Brazil player pariat ngawt chu an ramin a koh laiin an haw lo a, Brazil hi FIFA hnenah a zualko - hrem theih dinhmunah City keeper Ederson leh striker Gabriel Jesus an ding mek a, he thu buatsaih a nih lai hian thuchiang a awm lo.

City-in Jesus an chhawr thei lo a nih pawhin buaina a awm lo a, mahse, Ederson chhawr theih loh erawh buaina a ni dawn. Second choice keeper Zack Steffen-a'n Covid-19 a kai a, third keeper Scott Carson chhawr a ngai dawn tihna a ni.

Pep-a kaihhruaina hnuaiah Ederson hi goal vengtu a ni satliah lo a, tlarhnung aṭanga game siamtu a ni tel - chutianga ti ve turin kum 36 mi Carson-a theihnain a tlin a rinawm loh a, Foxes-in James Maddison, Jamie Vardy leh Harvey Barnes hmanga an goal nawr tur chu a dang zo ang em, tih chu zawhna awm thei a ni bawk.

Chanchin lawmawm
Ederson vangin City fans an hlauthawng a, hetihlai hian Leicester lam erawhin chanchin lawmawm an nei thung. Foxes coach Brendan Rodgers chuan a defender inhliam Jonny Evans, Jannik Vestergaard leh Ryan Bertrand te chu chhawr theih an nih tawh thu a sawi.

Rodgers hian a player pathum hi an vaia a 'risk' nghal vek erawh a rinawm chiah lo a, City-in goal nawr tura Jack Grealish, Ferran Torres, Raheem Sterling leh Bernardo Silva te ho an neih avangin fimkhur an mamawh.

Foxes hian City hi Community Shield-a an hneh hnu anga an thlir chuan an tisual ang. Pep-a team hian Leicester an ngam loh hnuah khan Tottenham Hotspur chu 1-0 in an ngam lo zui a, Spanish manager thlen hian sawisel a hlawh hman.

Mahse, City an zuai rei lo - 5-0 ngawtin Norwich City an sawp zui a, Arsenal chu 5-0 thoin an sawp bawk. An league match hnuhnung pahnihah goal 10 khungin an lamah a lut lo tihna a ni a, league match thum an khelha goal nga chhuah tawh Foxes tan fimkhur a ṭul ang.

Rodgers vs Pep
Foxes-in coach Rodgers-a hnuaiah hmasawnna tam tak an hmu - FA Cup leh Community Shield nomawi a chawipui tawh a, tun season-ah 'top four' an beisei dawn. Chumi tur erawh chuan team ṭha an el phak a ngai.

Rodgers leh Guardiola hi vawi riat an lo intawng tawh a, Pep-a'n record a nei ṭha zawk. Spanish coach hian vawi li hnehna a chang a, vawi hnih an inhnehtawk a, Rodgers-a'n vawi hnih hnehna a chang ve.

Liverpool manager hlui Rodgers chuan, "City hi team ṭha tak an ni a, khawvela manager ṭha ber an nei bawk. Hei vang tak hian anni ang team hmachhawn hi chu chona phurawm tak a ni reng a ni," tiin City a fak a, a zam phah lo thung.

Rodgers chuan, "Ball chan tam a harsa dawn tih ka hria a, chan chhunah erawh rilru pek a ngai a, inrintawkna neih a ṭul bawk. Coach ṭha tak hnuaiah player ṭha tak tak an khel a, an coach hian an theihna phochhuahsak dan a hre em em bawk. Mahse, anmahni el turin kan inbuatsaih ang," a ti a, tlawmsa rilru a pu duh lo.