Rudiger hma hun tur a chiang thei lo

Chelsea chuan an defender pawimawh Antonio Rudiger chu contract thar ziahpui tumin indawrna an kalpui mek a, mahse, Rudiger hian inngaihtuah nan hun a la duh deuh niin sawi a ni.

Germany international hi season tawp rualin Stamford Bridge-a a contract a tawp tawh dawn a, January-ah a duh lam club pan turin amah duhtu club a dawr thei dawn.

Paris Saint-Germain coach Mauricio Pochettino chuan Rudiger hi lakluh ngei a duh nia sawi a ni a, hetihrual hian Rudiger-a unaupa leh agent ni bawk Sahr Senesie chu Chelsea director Marina Granovskaia nen an indawr mek tho.

Chelsea boss Thomas Tuchel-a'n Rudiger a mamawhzia a hai lo a, May thla khan a defender pawimawh hi chelh ngei a duh thu a lo sawi tawh.

Tuchel chuan, "Contract thar ziah a duh a nih phawt chuan contract thar pek kan duh reng. A thil tih hmangin a theihna a pholang a, he hmun kan pan ni aṭang khan rinhlelhna ka nei lo.

"Ni khat chauh training kan neih hnuah khan team tana khel turin ka thlang nghal. Kurt Zouma tan chuan a fair lo mai thei a, mahse, German a nih avangin ka hrechiang sa a, a tih theih ka hria a, chance kan pek veleh a theihna pholan nan a hmang nghal a ni," a ti.

Chelsea hian zanin dar 10:00-ah Premier League match an khel dawn a, nipui transfer-a sum hmang hnem Aston Villa an mikhual dawn avangin a awlsam lo ang.