Spurs damdawi in a lun!

Premier League match thum khelh tawha la chak vek awmchhun Tottenham Hotspur chuan vawiin tlai dar 5:00 hian league match khel turin Crystal Palace an lenchilh dawn a, mahse, London club hian hliam leh quarantine vangin player pasarih vel an chhawr thei dawn lo!

Spurs forward pawi-mawh Son Heung-Min, left back Ryan Sessegnon, midfielder Oliver Skipp leh winger Steven Bergwijn te chu international break-ah ram tana an feh chhuahna lamah an inhliam a, he thu buatsaih a nih thleng hian an inlan theih dawn leh dawn loh a la chiang lo.

South Korea international Son Heung-Min dinhmun hi a ngaihtuahawm loh nia sawi a ni a, league match thuma goal hnih khung tawh forward hi Spurs tan a inlan thei a nih chuan danglamna thlen thei player a nih avangin Palace tan ven uluk a ṭul ang.

Defender Davinson Sanchez-a'n international break-ah Colombia squad a zawm a, Bolivia leh Paraguay a hmachhawn avangin ni 10 tal a inkhunghran a ngai dawn.

Spurs defender thar Cristiano Romero leh Giovani Lo Celso te international break-ah club phalna hmu loa Argentina squad zawmah puh an ni a, club-in an hrem ngei a rinawm.

Chutihrual chuan player pahnih hi Brazil an zin miau avangin inkhunghran an mamawh dawn bawk a, Spurs-in hliam leh Covid-19 avanga player pasarih dinhmun chiang lo chungin Palace an lenchilh dawn.

Spurs hian tun season-a league match thum an khelhah hnehna an chang vek a, Manchester City (1-0), Wolverhampton Wanderers (1-0) leh Watford (1-0) an hneh - Palace lakah pawh chak an beisei ang.