VVD a inkhel thei dawn - Klopp

Liverpool defender rinrawl Virgil van Dijk chuan international break-ah hliam a nei niin lang mah se Netherlands defender dinhmun a ṭhat thu Reds manager Jurgen Klopp chuan a sawi a, Pathianni zan dar 9:00-a Leeds United an lenchilh hunah a inlan thei ang.

VVD hi Thawhlehni zana Turkey laka 6-1 a an chak ṭumin a inhliam niin a lang a, minute 90 khel mah se a bai chhuah deuh avangin Reds ṭantute ngaih a ṭha lo hman.

Mahse, Klopp chuan, "Virgil khan hliam na tak a nei emaw ka ti hman a, an inkhelh zawh veleh message ka thawn nghal a, a ngaihtuahawm loh thu min lo hrilh.

"Bus-a an chuan hnuah min rawn be leh a, a dinhmun a ngaihtuahawm loh thu a rawn sawi leh a ni," a ti a, he thu buatsaih a nih lai hian VVD-a'n pangngai taka club training a zawm leh tawh avangin Leeds lakah bul a ṭan ngei a rinawm.

Midfielder inhliam James Milner pawhin training a zawm leh tawh a, bul ṭan tur khawpa a dam chian hman erawh a rinawm chiah lo.

Mahse, Liverpool hian FIFA hrem vangin Alisson, Fabinho leh Roberto Firmino te an chhawr theih dawn leh dawn loh a la hriat loh a, a bik takin keeper Alisson hi a inlan theih loh chuan Reds tan a pawi zual ang.

Liverpool hian Alisson thachhang dawltu Adrián, Loris Karius leh Caoimhín Kelleher te an nei a, Adrian hi Alisson aiawh tur bera ngaih ni mah se season hmasaa a khelh dan thlir chuan Reds fan-te an thla a muang lo khawpin a rinawm.

Firmino hian hliam tenau a neih avangin hrem a nih loh pawhin bul a ṭan a rinawm loh a, Mohamed Salah, Diogo Jota leh Sadio Mane an la awm tho avangin ngaih ṭhat lohna tur erawh a awm lo.

Klopp chuan FIFA hremna chungchangah, "Engmah sawi theih ka nei lo a, meeting la neih mek chauh a ni," a ti a, thutlukna mumal taka siam a la awm lo niin a lang.

Japanese forward Takumi Minamino chu a inhliam avangin a la inlan thei dawn lo a, England Under 21 squad aṭangin Harvey Elliott inhnukdawk mah se ngai a awh leh tawh thung.

FIFA hrem theih zingah Leeds United winger Raphinha a tel ve bawk a, Brazilian forward tel lo chuan Elland Road-ah Leeds goal nawr a na lo sawt ang.