Arsenal tan chakna hun ṭha

Mikel Arteta chuan nipui bazara sum an hman hnem chu a taka lantir a hun thu a sawi. Arsenal hian Premier League khel turin zanin dar 7:30 hian Emirates Stadium-ah Norwich City an mikhual ang.

North London club hian an match hmasa berah kai thar Brentford an ngam lo, chumi hnuah Chelsea leh Manchester City lakah an tlawm zui bawk - nipui bazara sum hmang hnem ber ni chung sia an result hian sawisel a hlawh takzet.

Arteta chuan, "Player zawng zawng inkhel thei se, ṭha takin season bul ṭan ila tih kha kan duhdan a ni, tuna kan dinhmunah hian chhuanlam siam erawh kan tum lo. Tunah chuan player hliamte an dam chho a, kawng dik kan zawh leh tawh.

"Norwich nen kan inhmachhawn leh dawn a ni a, tun hma lama kan thupui ang bawkin Arsenal chuan chak kan tum leh ang. Anni hi manager ṭha takin a kaihhruai a ni a, khelh dan phung nghet nei an ni," tiin a sawi.

Season thar inbuatsaih laiin Thomas Partey a inhliam a, an midfielder pawimawh hi a dam tawh. Hri leng vanga inlan thei lo Ben White pawhin kar khat chhung ṭha takin training a zawm tawh bawk, anni pahnih an inlan thei tur hi Gunners tan chanchin ṭha a ni ang.