Mbappe chhuak lo hi a ṭha - Pauleta

Paris Saint-Germain legend Pauleta chuan Kylian Mbappe tan PSG-a awm zel a ṭhat thu a sawi a, player ṭha pahnih Lionel Messi leh Neymar te kiangah thil tam tak a zirchhuah belh ngei a beisei thu a sawi bawk.

France international Mbappe hi nipui bazarah khan Real Madrid nen an indawr a, mahse Spanish club lian hi a zawm rih ta lo. Paris club tan tun season khat daih chauh contract a nei tawh a, a pawtsei lo a nih chuan nakkumah a thlawnin a chhuak thei dawn.

Pauleta chuan, "Mbappe hian insiamrem ngaihna lai a nei dawn. Lionel Messi kiangah thil tam tak a zir thei dawn a, Messi leh Neymar ten hmun awl an siam karah a tlan chakna hmangin remchang a insiam thei ang.

"Mual sir leh laiah Mbappe hi a khel thei ve ve a, hetiang player ṭha bik hi chu club tan pawh a ṭangkai," tiin a sawi. Champions League nomawi an chawi theih nan chuan Messi, Neymar leh Mbappe te an inkawp rem a pawimawh thu a sawi bawk.

Mauricio Pochettino enkawl PSG hi tun season Ligue 1 match li an khelh tawhah an la chak vek, zanin dar 8:30 hian kai thar Clermont Foot an mikhual leh ang.