Champion kan la tum reng - Juventus director
Juventus director Federico Cherubini chuan Cristiano Ronaldo a chhuah avangin champion an tum ta lo tihna a ni lo a, engtik lai pawhin hlawhtlinna chan châka an tuihal reng thu a sawi chhuak.
Nipui bazarah Old Lady hian season hmasa Serie A top scorer Ronaldo an chhuahtir a, tlarhma lama khel turin Everton striker Moise Kean an hawh thung - transfer bazara an chet danah Italian club hian sawisel an hlawh.
Mahse, Juve director Cherubini chuan, "Team ṭha leh nghet nih kan la tum reng, club kalphung leh inrelbawl dan erawh a danglam chang a awm ve thung. Tun hma chuan tlarhnung nghet leh rinawm tak kan nei ṭhin.
"Kan tlarhnung hi a nghet ta lo tihna a ni lo a, tunah hian player naupang zawkte nen team nghet tak din turin kan bei mek, coach thar kaihhruaina hnuaiah beisei pawh kan nei sang hle," tiin a sawi.
Juventus hi tun season an match hmasa berah Udinese nen 2-2 in an inhnehtawk a, match hnihnaah an mikhual Empoli chu 1-0 in an ngam lo. Manager thar Massimiliano Allegri hnuaia an khelh dan leh player langsar an lak loh avangin sawisel an hlawh.
Cherubini chuan, "Kan squad hi en teh u - Chiellini, Bonucci, Danilo, Dybala, Morata, Cuadrado leh De Ligt te an awm. Anni club bakah an ram tana player pawimawh leh ṭha bikte an ni. Kan bazar dan pawh ngun taka chhut chuan champion kan la tum reng tih a lang," a ti.
Juve hian zanin dar 9:30 hian Diego Armando Maradona Stadium-ah Napoli an lenchilh dawn a, an tlawm leh a nih ngat chuan manager Allegri chungah fans an lawm lo nasa khawp ang - Napoli hi match hnih an khelh aṭanga point ruk hmu thei an ni thung.
World Cup qualifier khelhna lama inhliam Federico Chiesa a inlan theih a rinawm lo a, South American player - Paulo Dybala, Danilo, Alex Sandro, Rodrigo Bentancur leh Juan Cuadrado te pawh chhawr turin an inpeih hman a beiseiawm lo bawk.
Midfielder Aaron Ramsey leh Arthur te hliam vanga an la chawlh bawk avangin Allegri-a'n duhthlan tur a nei tlem dawn, inkhelh harsatna hmuna leng lut tur an nih bawk avangin point khat an hlawh chhuak a nih pawhin chanchin lawmawm a ni ang.