Bernabeu-ah Modric a kir dawn?

Thla 18 zet Santiago Bernabéu Stadium-a an inkhelh tawh loh hnuah Real Madrid chu Pathianni zan dar 12:30 hian an stadium hmingthangah an inkhel leh dawn ta a, La Liga match khel turin Celta Vigo an mikhual dawn.

Real fan-ten stadium-a an kir dawn piahlamah chanchin lawmawm dang an hriat belh a, an midfielder pawimawh Luka Modric chuan hliam vanga a chawlh reng hnuin club training a zawm leh tawh.

Modric hian season bul ṭan nana Alaves 4-1 a an sawp ṭum khan inkhel bul a ṭan a, mahse, a hnuah training-naah hliam tuarin Levante leh Real Betis a hmachhawn leh tawh rih lo.

Kum 36 mi a nih avangin Modric-a hliam chungchangah Real an hlauthawng viau hman a, mahse, beisei aiin Croatian midfielder a dam chak - Pathianni zana a inkhelh leh khelh loh chu coach Carlo Ancelotti kutah a awm tawh.

Real tan Nacho Fernandez leh Toni Kroos ten a hranga training neiin, full training pawh an zawm leh hnai tawh bawk a, Santiago Bernabéu-a kir dawnah Real-in chanchin lawmawm hlir an nei.

Real hian March 1, 2020 khan Santiago Bernabeu-a an match hnuhnung ber an khel a, Barcelona lakah 2-0 in an chak. Mahse, Covid-19 vangin khawvel a buai zui a, stadium-ah entu an awm thei lo.

Real-in an stadium an thuam ṭhat lai a nih avangin hei hi remchangah an la a, an club training complex lama Alfredo Di Stéfano Stadium-ah an insawn - stadium hi la sa ṭha zo lo mah se inkhel entu an awm leh theih ṭan tak avangin Bernabeu-ah an kir.

Santiago Bernabeu thuam ṭhat nan hian Real Madrid chuan euro maktaduai 600 chuang an ruahman a, stadium hi concert, business conference, e-sports tournament, basketball leh tennis match te khelh theihna tura ruahman a ni.

Heng bakah hian shopping centre, club museum, restaurant leh thil dang dang pawh dah tum a ni a, an sak zawh meuh chuan khawvela stadium ropui ber pawl a ni ang.

Hetihlai hian La Liga match engemawzat chu South America ram tana feh chhuak player-ten chawlh an neih theihna turin a khelh hun sawn a ni a, Barcelona pawh Sevilla nena an inkhel tur chu sawn a ni - a ni erawh sawichian a la awm lo.

Villarreal leh Alavés inkhel tur pawh sawn a ni a, Real leh Celta inkhel tur pawh hi zanin tura ruahman zet ni mah se Pathianni zan atan hian sawn a ni - zaninah league match hnih chiah La Liga-in an nei dawn.

League match khelh hun sawn hi La Liga chuan Royal Spanish Football Federation (RFEF) hnenah an dil a, Spanish FA lam hian a tirah pawm lo mah se La Liga hi High Council for Sports (CSD) hnenah an kal leh a, court hian league thuneitute duhdan hi kaltlangpui turin a ti ta a ni.