Chawlh hmang tur ka ni lo - Ronaldo

Cristiano Ronaldo chu kum 36 mi a nih hnuah a larchhuahna club Manchester United-ah a let a, ṭha taka khel tura theihna a neih thu leh a inpeih tawh thu a sawi.

Portuguese forward hian Man-chester United tana a hun hmasaah khan kum ruk chhungin match 292-ah goal 118 a khung.

Ronaldo chuan, "Theihna ka nei a, ka inpeih," tiin a sawi a, zanin dar 7:30 hian Old Trafford-ah Manchester United leh Newcastle an inkhel dawn a, a inlan ngei a rinawm hle.

Theihna a la nei?
A kum aṭanga teh chuan Ronaldo hi kum 36 mi a nih tawh miau avangin a uai thla lam ve tawh tur chu a ni a, a kum ang zatah chuan footballer tam zawkin inkhelh an chawlhsan tawh hial.

Ronaldo erawh uain ṭha mi ang maiin a la ṭha dawn chauh emaw tih mai tur a ni. Season liam ta khan Juventus tan Serie A match 33 aṭangin goal 29 a khung a, 'Paolo Rossi Award' a dawng.

Nipui lai khan Euro 2020 khelh a ni a, hetah pawh hian goal nga khungin Golden Boot a dawng. Old Trafford a pan hma hian World Cup khel tur zawnnaah Republic of Ireland lamah goal hnih a khung a, Portugal hnehna a chanpui bakah ram tana goal khung tam ber a ni.

Ronaldo hian Portugal tan goal 111 khungin Ali Daei record khumin ram tana goal khung tam ber record a siam. A kum en kanin tun hnaia a chet dan thlir chuan theihna a la nei ngei e.

Chona thar
Manchester United hian Sir Alex Ferguson-a chawlh hnuah league nomawi an la chawi leh lo a, 2012-13 season kha nomawi an chawi hnuhnung ber chu a ni ta.

Ronaldo chuan, "Hei hi ka rawn let chhan chu a ni. Chawlh hmang tur ka ni lo. Ka rawn kal hmasak khan ka hlawhtling thawkhat a, inelna pawimawh tak takah hnehna kan chang. Man United tan tun hmain ka lo khel tawh ṭhin a, tunah hlawhtlinna chang leh turin ka rawn kir.

"Ka tan hun ṭha a ni a, supporter leh club tan pawh rahbi thar kai tura hun ṭha a ni. Ka inpeih a, kum thum, kum li chhung chu player pawimawh tak ka la ni ang," tiin a la indah sang hle.

Portuguese striker sulhnu chhui kir ta ila, Manchester United tan league nomawi pathum; Champions League, FA Cup, Club World Cup leh Community Shield nomawi pakhat ṭheuh bakah League Cup nomawi pahnih a chawi.

Ronaldo hian Real Madrid leh Juventus tana a khelh hnu pawhin nomawi a chawi zel a, tuna a rawn letna Manchester United erawh kum 2009-a a kalsan ang kha an ni tawh lo. Tuna an manager Ole Gunnar Solskjaer hnuaiah nomawi an la chawi lo a, Ronaldo tan chona pawimawh tak a ni.