Ronaldo inlan zan

Zanin dar 7:30 hian Manchester United-in Old Trafford-ah Newcastle United an mikhual dawn a, jersey number 7 nena Cristiano Ronaldo a inlan dawn avangin khawvelin an hmu châk tawh hle.

Ole Gunnar Solskjaer chuan, "Engtik hunah emaw chuan khelmualah a lut ngei dawn tih chu a chiang. Cristiano hlawhtlinna kan hria a, hlawhtlin belh duhin kan bulah a lo kir. Ani a awm hi chuan training-naah 95% pek a thiang lo, theihna zawng zawng pe turin mi zawng zawng a beisei," tiin Ronaldo a fak a, bul a ṭan dawn em tih erawh a sawi chiang duh lo.

Portuguese forward hian Newcastle lamah hian record a nei ṭha hle, vawi 11 a hmachhawn tawhah goal 11-ah a inrawlh - goal ruk khungin assist vawi nga a nei. Hei chauh hi an ni lo, Old Trafford-a an mikhual hnuhnun ber ṭum December 2008-ah phei chuan hattrick a siam.

England training-naa inhliam Jadon Sancho a dam tawh a, traning a zawm tawh. Ronaldo ang thoin Sancho-a'n bul a ṭan dawn em tih a chiang lo a, Raphael Varane erawh captain Harry Maguire nen an inkawp ang.

World Cup qualifier khel tura zin lo Fred-a dinhmun a chiang lo. Solskjaer chuan, "A tel loa kan inpuahchah a ṭul a, chutihrualin thu dang a awm thei bawk," tiin FIFA-in hriatthiamna a neih theih thu a sawi. Hemi chungchangah hian Man City manager Pep Guardiola leh Chelsea manager Thomas Tuchel te pawhin thu thar duhawm a awm theih an beisei thu an sawi ve bawk.