Old Trafford lamtirtu Ronaldo

Cristiano Ronaldo zawng 'mi bik' a ni e. Old Trafford-ah champion an lawm emaw tih mai turin Ronaldo lawmtu Manchester United ṭantute thawm a ring a, kum 36 mi hian goal hnih hmangin amah lawmtu mipui lawmna a belhchhah.

Inrinni zan Premier League inkhelah Man United-in an mikhual Newcastle United 4-1 in an hneh. Ronaldo-a'n goal hmahruai a khung hnuah Magpies-in Javier Manquillo hmangin siphurh an sut a, Ronaldo bawkin hmahruaina goal khung lehin Man United tan Bruno Fernandes leh Jesse Lingard ten an khung belh bawk.

Ole Gunnar Solskjaer-a hoten Premier League-ah hma an hruai a, season tawpah a chung berah an la awm thei a nih chuan Ronaldo ropuina nasa takin a belhchhah ang.

Ropui tura duan
Cristiano Ronaldo-a'n kum 36 mi a nih tawh avangin football khawvelah hun tam a ngah tawh lo tih a hria a; inkhel pangngai, pawimawh leh pawimawh bik a thliar hrang thiam.

Manchester United-in Ronaldo an lakluh thu an puan khan Portuguese forward hi ram tana khel turin Lisbon-ah a awm a, Real Madrid forward hlui hian ram tana goal tam ber khung chu a ropuina belhchhahna tura hna hmasa tih a hria.

Ronaldo-a'n Portugal chakpuiin Republic of Ireland lakah goal hnih a khung a, ram tan goal 111 khungin record thar a siam. Qatar nen friendly match khelh tur an nei a, hei chu Ronaldo tan inkhel satliah a ni tawh a, hrem vanga Azerbaijan nen a inkhelh theih loh bawk avangin England a pan nghal.

Newcastle hmachhawn turin Ronaldo a inbuatsaih hma a, Old Trafford-a inkhel tur a nih avangin inkhel pawimawh bik a ni tih a hre chiang. Inkhel hi Premier League match khat ang tho a tih theih a, mahse Ronaldo-a'n United jersey a hak lehna hmasa ber tur a nih avangin a pawimawh em em a ni.

A ropui e
Old Trafford hi England leh India ten fifth Test an khelhna tur hmun a ni a, Covid-19 vangin inkhelh an ṭhulh. Chutihrualin Manchester khaw boruak erawh cricket vanga ngui hman an ni lo a, Ronaldo chanchin bak sawi tur a awm lo.

Inrinni chhun aṭangin cricket khelhna tur stadium kawt, Manchester United player-te thlenna hotel kawt leh Old Trafford kawtah Ronaldo jersey number 7 nen an vei suau suau tawh. Bus-a Ronaldo chuang lai hmuh tum ringawt pawh hi ṭhahnem tak an ni.

Stadium-ah pawh kum 18 liam taa Manchester United tana Ronaldo khelh ṭantirtu Sir Alex Ferguson, khami ṭuma an khingpui Bolton Wanderers manager Sam Allardyce leh mi lar ṭhahnem tak an awm. Warm up tura an player-te an chhuah aṭangin thawm a ring tawh a, inkhelh ṭan tura player-te an luh chiah phei chuan a ring lehzual.

Man United ṭantute hian Ronaldo puala an hla 'Viva Ronaldo' chu an sa leh ta a, inkhelh ṭan hnuah pawh thawm hi a reh mai lo. Inkhelh tawp hnu darkar khatah pawh Ronaldo tan thawm ring tak an la siam a, Sir Alex Ferguson hun laia Old Trafford-a thawm ring tak kha a rawn let leh ta. He thawm hi United player-te au phurtu leh an khingpuite tana mangchhia ni ṭhin kha a ni.

Ronaldo nge nge
Newcastle manager Steve Bruce-a'n a khingpui Man United a hrechiang a, defence-ah player panga ngawt a dah. Man United jersey number 7 Ronaldo pawh an veng uluk hle. Mahse, Ronaldo zawng a danglam a, first half injury time-ah goal hmahruai a khung.

Ole Gunnar Solskjaer-a'n Marcus Rashford leh Mason Greenwood te a duh khawp lohna ṭhin chu goal ropui an khung a, goal awlsam khung turin goal hmaah an rilru an pe tawk ṭhin lo. Ronaldo erawh goal hmaah sakeibaknei rilṭam ang maiin ball a zawng a, a hun ṭha neih a hlah lo.

Man United phurna hi Newcastle tana Javier Manquillo goal khungin rawn ti dai deuh mah se Ronaldo bawkin Old Trafford-a inkhel entute a rawn lamtir. Minute 62-naah Luke Shaw-a ball pek chu Ronaldo-a'n ṭha taka lalutin hmahruai nawnna goal pawimawh a khung a, goal hmahruai ai mahin goal hnihnaah thawm a ring zawk.

Kum 36 mi Ronaldo a khel tluan ṭhak a, United pawhin Bruno Fernandes-a goal ṭha leh substitute Jesse Lingard-a goal mawi hmangin an khung belh a, 4-1 in an chak.

Ronaldo a zam?
Inkhelh zawh aṭanga darkar khat hnuah Old Trafford-ah Ronaldo an kawm a, mipui an la zai dup dup a, Man United ṭantute lawmna thua sawifiah theih a ni lo.

Ronaldo chuan, "Mumang ram ang mai a ni. Ka zam takzet a, inkhelh hma zan khan ka ngaihtuah nasa. Ṭha taka khelh ka duh a, team ṭanpui turin theihna pawh ka neiin ka hria. Mahse goal hnih khung ka inbeisei lo a, goal khat chu ka beisei. Hun duhawm bik a ni," tiin thil thlen dan chu rin thiam phak bak a nih thu a sawi.

Portuguese forward chuan sawi chhunzawmin, "Tupawhin England hi chu a danglam tih an hria a, khawvel hmun dang nen a inang lo. Kei chuan ka ngaihlu ber. Kum 18 ka nih khan ṭha takin min enkawl a, tun ṭumah pawh chuvanga rawn let chu ka ni. Man United hi ka dah sang a, min duhsak avangin ka theihna zawng zawng ka chhuah ang," tiin a sawi.

Ronaldo hian kum 2003 leh 2009 inkar khan Man United tan match 292 khelin goal 118 a khung a, kum 12 leh ni 118 hnuah Old Trafford-ah letin match hmasa berah goal hnih a khung nghal.

Manchester United-in Thawhlehni zan dar 10:15 hian Champions League-ah Young Boys an hmachhawn dawn. English club hian UCL nomawi panga chawi thei Ronaldo an kawl avangin champion beiseiawm zingah an tel pha ang.

Ronaldo telna Man United an chak
Manchester United chuan Inrinni zan khan Old Trafford-ah Newcastle United 4-1 in an hneh. Ole Gunnar Solskjaer-a hote tan hian Cristiano Ronaldo-a'n goal hnih a khung bakah Bruno Fernandes leh substitute Jesse Lingard ten an khung ve bawk.

Newcastle United-in Javier Manquillo hmangin goal khat khung ve bawk mah se Ronaldo an chelh thei loh avangin point an hlawh chhuak lo. Premier League table chung berah Man United an awm laiin Magpies erawh point khat chauh hmuin 19-naah an awm.

Ronaldo leh midang
Ram aiawha khelte hriatthiam an nih tak avangin Fred chu chhawr theih ni mah se Ole Gunnar Solskjaer-a'n Brazilian midfielder aiah Nemanja Matic a thlang tho. Mipui hmuh châk Ronaldo chu a hma tawngah awmin Jadon Sancho, Bruno Fernandes leh Mason Greenwood ten an thlawp. Paul Pogba chu Matic nen midfield laiah an inkawp.

Tlarhnungah World Cup nomawi chawi tawh Raphael Varane chuan bul a ṭan a, Real Madrid aṭanga Man United zawmtu defender hi Old Trafford-a a khelh hmasak ber ni mah se Ronaldo vangin ngaihsak a hlawh tawk lo.

Chutiang bawkin inhliam vanga squad-a dah loh Edinson Cavani chungchangin sawi zui a hlawh lo a, Ronaldo a langsar hle. Newcastle United erawhin Paraguay tana inkhel tura zin lo Miguel Almiron an chhawr thei lo a, kum 29 mi midfielder hi player hmuhnawm zinga mi a ni.

Danglamna Ronaldo
Manchester United-in ball an chang tam a, amaherawhchu defender panga awmna Newcastle tlarhnung an su tlang thei lo a, an corner hmuh angte pawh Magpies keeper Freddie Woodman-a'n harsatna nei loin a man zel.

Mikhual team hian ball an chang chhunah erawh an nawr ngam a, Allan Saint-Maximin tharum leh ball thiamna chu Man United tlarhnung tan a hnawksak pha. French forward Saint-Maximin hi a finishing a ṭha tawk lo a, Man United an him.

Arsenal aṭanga Newcastle zawmtu Joe Willock-a'n pass aiah shot a thlang a, a goal teuh lo - pass ngat se result a danglam phah thei hial ang. First half-a team pahnih danglamna chu Ronaldo a ni a, injury time-ah Mason Greenwood-a pet chu defender-in a dan per avangin keeper Woodman-a'n a ti per a, Ronaldo-a'n awlsam takin a khung.

United tlarhnung
Man United tlarhnungah Luke Shaw (£27m), Harry Maguire (£80m), Raphael Varane (£42m, adds-on telin) leh Aaron Wan-Bissaka (£50) te an awm a, an man en mai chuan harsatna tel loa Newcastle player-te chelh thei tur an ni.

Mahse, Ronaldo vanga mipui phur karah United tlarhnungte awmna tura ngaihah awm loh chang an ngah a, goal an chhuah pawh hi a mak lo. Minute 56-naah Newcastle United-in counter attack hmangin an vaw let a, Man United tlarhnung pherh zia a lang.

Maguire-a'n midfielder ball thiam Almiron-a'n a tackle hman lo a, Paraguayan midfielder tibuai turin Wan Bissaka position a dik lo. Almiron hian Saint-Maximin a pe a, Magpies forward hmaah Varane awm mah se Javier Manquillo a rawn overlap ṭhat avangin French defender tan dan thehi a ni lo. Newcastle wing back Manquillo hian ṭha zetin a pet goal.

An thiam e
Ronaldo vangin Man United boruak a dik hrim hrim a, Portuguese forward hian minute 62-naah Luke Shaw hnen aṭanga a ball hmuh chu ṭha taka la lutin a pet goal. Mualneitu lam erawh ngaih ṭha taka awm thei an ni lo a, Willock-a'n De Gea tana hna a siam leh avangin ngaih ṭha taka awm turin goal dang an mamawh.

Minute 80-naah Fernandes-a'n box pawn aṭangin goal kilah a pet lut a, goal ṭha bik vangin an dinhmun a him. Man United-in an la duhtawk lo a, injury time-ah team goal mawi zawk an khung. Substitute Lingard chuan box chhungah Pogba ball pek chu ṭha zetin a pet lut a, goal luh theih nana Anthony Martial 'dummy' pawh a mawi hle.

Cristiano Ronaldo hi inkhel pawimawh atana duan a ni a, zahngaihna a nei lo. Goal hmaah a hriam a, team chauh ni loin a chhehvela mi zawng zawng a ti phur. Team tana ṭangkai player a ni a, goal scorer ṭha bik a ni a, a puitling tawh hle. Newcastle hmaah khan a khel ṭha em em a, team-in ball an inpek kual theih nan pawh a ṭangkai hle. Substitute-a dah tumna kan nei lo hrim hrim a, chu chaun tu nge a nih chu a pholang. Tute pawh an hlim. Hnehna kan chan avangin kei ngei pawh ka hlim. Beiseina a sang a, ka player-ten mipui beiseina an ti hlawhtling. - Ole Gunnar Solskjaer, Man United manager

Ronaldo khan Newcastle United a them. A chang hi chuan lawmpui mai hi a ṭha a, hun rei tak chhung ṭha taka a khelh theih avangin a ropui. A rawn kal a, a hnathawh kan thlir a, hetianga a ti reng thei hi a mak a ni. Football tana a hnathawh ropui tak avangin zah a phu a ni. - Alan Shearer, Newcastle striker hlui

Goal khung thei bik striker danglamna chu kha kha a ni a, defender an muthlu zeuh a nih chuan an goal an khung a ni mai. Tute pawhin an ngaihsan rawn a ni a, a hlawhtlinna hi a ropui. Vawiinah pawh a tih ṭhin bawk kha a ti nawn leh a ni. Mi danglam bik a ni e. - Steve Bruce, Newcastle United manager