Arsenal an chak ve ta

Pierre-Emerick Aubameyang-a goal khat hmangin Arsenal chuan an mikhual Norwich City chu 1-0 in an hneh. Premier League season kal laia a vawi khat nan Mikel Arteta nauten hnehna an chang ve ta.

Match hmasa pathuma an tlawm zawn hnuah Gunners an chak a, manager Arteta chuan Emirates Stadium chhungah ngei mai, fans tam tak hmaa point thum an hmu ve ta chu a lawm thu a sawi.

Pound maktaduai 72 man Nicolas Pepe-a'n goal ban a pet per dawp a, ball lo let hi buai nuaih karah goal ban bawk a tih per - goal hma zawn taka lo awm Aubameyang chuan awlsam takin a lo khung.

North London club tan defender thar Ben White leh Gabriel Magalhaes te an inkawp fuh a, keeper Aaron Ramsdale-a'n league match a khelh hmasakah goal a chhuah lo, midfielder Thomas Partey a inlan theih tawh bawk avangin an tan chanchin ṭha a ni.

Arteta naute hian September 26, Pathianniah North London Derby khel turin Tottenham an mikhual dawn, chumi hmain inbuatsaih nan Burnley an mikhual ang - Norwich City laka hnehna an chan avangin result ṭha neih chhunzawm an tum ang.