Tennis fanu thar Emma Raducanu

Racquet a humna a kut phah sa a chhem dai heuh heuh laite chu hmuhnawm a tling a, winners a vuak chhuah ruala a lawm au ri te chuan beng a verh takzet - a lak phak loh tura ball an vuak kal a en liam laite chu puih mai châktu an tam. Ni e, tennis ngainatute chu Emma Raducanu zûnah an uai mek.

Inrinni zan US Open final inkhel hmuhnawmah British tleirawl Raducanu chuan darkar khat leh minute 51 chhungin Canadian tleirawl Leylah Fernandez 6-4, 6-3 in a hneh a, kum 18 mi hian Grand Slam tournament a khelh vawi hnihna lekah set hloh miah loin nomawi a chawi nghal.

Raducanu hi qualifier khela tournament bul ṭan chunga Grand Slam-a champion thei hmasa ber leh awm chhun a ni a, mipa leh hmeichhe zingah amah anga bul ṭana champion zui ta hi an la awm lo.

Champion thar
Arthur Ashe Stadium-a inkhelah a tir aṭangin Raducanu chu boruak ngam leh langsar zawk a ni. Set hnih an khelhah hian Britain nula hian a khingpui service vawi hnih ve ve a chhuhsak a, ṭum hnih a service hloh ve bawk mah se buaina a tawk lo.

Set hnuhnung zawkah 5-3 a hmahruai chungin Raducanu-i'n a service a, mahse hliam tenau a tawrh avangin 'medical time-out' a nei zuai a, kum 19 mi Fernandez chuan a khingpui hi hliam na tak tak loah a ngai - match official hnenah a zualko hial.

A service hloh thei dinhmuna a din lai taka Raducanu chet dan a sawiseltu Fernandez thil tih hi a mak hran lo, chutih rualin dan ang thlap a thil tih a ni; inelna neih laia khel ṭha ber a nih miah avangin dan theih a ni ta chuang lo.

Tennis ngaina Britain mipuite hian hmeichhe player zingah Grand Slam champion an neih lohna a rei tawh. Virginia Wade (1977) hnuah major title la thei an nei ve leh chiah a, kum 44 chhung zet nghakhlel taka an nghah chu a takin an hmu.

Nula fing
Romanian pa leh Chinese nu inkara piang Raducanu hian tennis player ṭhain an neih tur ang chu a nei ṭha viau. Player ṭha a hmachhawn pawhin a chiai ngai lo, a khingpuite ṭhatna leh ṭhat tawk lohna lai a zir chiang peih a, an chak lohna laia a beih let thiam miau avangin hmachhawn a harsa.

Tennis-ah chuan service neih ṭhat a pawimawh, a bik takin first-serve a pawimawh zual. US Open-ah Raducanu hian a service hmasa 72% zet a ti dik a, player zawng zawng chawhrual 63% aiin a sang ṭha hle - a chakna hnar pawimawh tak a ni bawk.

Service a nei ṭha, chawh rualin a service hnuhnung pawh hi 93mph a ni phak - player dangte chawh rual (82mph) aiin a la sang ṭha hle bawk, a service hi a chakna thahrui a ni.

Raducanu fan chuan a forehand ṭhatzia an hre chiang ang, base line aṭang pawhin na takin a duhna laiah a vaw let thei a, hmeichhe player dangten an harsat ṭhin 'backhand' a thiam dan pawh midang chunglam a ni phak.

British tleirawl ni si, a pa Romanian ni si, a nu Chinese ni bawk si a ni!
Khatia a champion zawh hnu lawk khan China lama a fans tan Chinese (Mandarin) ngatin lawmthu sawina video a siam nghal a, Mandarin ṭawng hi a pai miah lo, niin an sawi.

Raducanu hi November 13, 2002 khan Toronto, Canada-ah a piang a, kum hnih mi a nihin a nu leh pa hnathawhna vangin England-ah an pem a, British khua leh tui nihna a nei zui ta a ni.

A pa hi Bucharest, Romania lam mi niin a hming chu Ian Raducanu a ni a, a nu hi Shenyang, China lam chhuak niin a hming chu Renee a ni.

Raducanu hian a nu leh pa ram leh hnam hi a la dah pawimawh hle a, a social media account lamah pawh 'London, Toronto, Bucharest, Shenyang' tiin a dah ṭhin - a chên mekna London, a pianna Toronto leh a nu leh pa pianna khua a dah ngat a ni - North America, Europe leh Asia a dâp vel a ni ber!

Ngaihnawm
• British nula zingah Virginia Wade (1968) hnua US Open title la leh thei hmasa ber a ni.
• Open Era chinah chuan qualifier paltlang chunga Grand Slam khel champion zui thei hmasa ber a ni.
• Maria Sharapova-i'n 2004 khan kum 17 mi chauh ni chungin Wimbledon title a la, ani hnu lamah major tournament-a champion thei naupang ber chu Raducanu hi a ni.
• Britain mipa leh hmeichhe tennis player zinga Grand Slam champion thei naupang ber.
• Serena Williams (2014) hnuah set hloh miah loa US Open champion (hmeichhia) leh thei hmasa ber.
• US Open hma khan tennis aṭanga a lawman dawn chu $303,376 (Rs 2,23,06,054) a ni, tuna a champion vang hian Rs 18,38,15,250 a dawng.
• World number 150 ni chungin tournament a khel ṭan a, tunah chuan number 23 a ni dawn - British bikah number 1 a ni ang.