A zawnin Juventus an tlawm
Inhnehtawk pawh Juventus tan chuan result ṭha lo a ni, chak loh phei chu insawifiah a ngai nasa ṭhin. Tunah zet chuan Old Lady hi Serie A match an khelh hnuhnung pahnihah an tlawm - manager thar Massimiliano Allegri tan chhuanlam tur zawn a ngai ta ruai mai.
Inrinni zan Serie A inkhelah Cristiano Ronaldo chhuahsan tak Juventus chu Napoli mualah 2-1 in an tlawm a, match thum khelh chinah point khat chauh a la neih avangin 16-na dinhmun an luah; an hnuaia awmte hi match hnih chauh la khel vek an ni bawk!
Goal khung hmasa
Match hmasa berah Udinese nen an inhnehtawk a, kai thar Empoli an ngam loh zui avangin Napoli lakah chak ngei ngei a pawimawh tih hre sa chungin Stadio Diego Armando Maradona-ah Juve an lenglut.
Hliam, hrem leh hri leng inkaih-hruaina vangin player ṭha ṭhenkhat an inlan thei lo. Mahse, Old Lady hi an squad chhah zia ngaihtuah chuan Serie A club dangte aiin an la ṭha zawk tho a, a enkawl hna chu manager Allegri kut a ni.
A tir aṭangin Napoli an phur a, remchang pawh an insiam hmasa zawk. Mahse, goal khung hmasa erawh Juventus an ni. Striker Alvaro Morata chuan mualneitu tlarhnung lam inthlahdah zeuh karah goal hmahruai a khung.
Bianconeri tan Weston McKennie leh Dejan Kulusevski ten hun ṭha nei mah se keeper David Ospina an paltlang thei lo, goal dang lut loin Allegri nauten chawlhlawk laiin 1-0 in hma an hruai.
Chhanletna
Luciano Spalletti enkawl Napoli lamin Serie A champion an tum tih second half-ah an lantir a, forward Lorenzo Insigne-a ball pet kum mawi tak chu keeper Wojciech Szczesny-a'n dang mah se, a per chu Matteo Politano tan a harsa tawh lo.
Team pahnihten goal khung belh an harsat a, point an insem mai dawn niin a lang hman. Amaherawhchu, hun tawp hma minute nga chauh awm tawhah Napoli lamin corner an hmu, buai deuh nuai karah defender Kalidou Koulibaly chun chakna goal a khung.
Senegal international Koulibaly hian a goal khung lawm nan camera a la chhuak a, mipui lam hawiin a 'click' zauh, a chet dan hian sawizui a hlawh a, inkhelh banah zawhna a dawng hnem nghal hle.
Koulibaly chuan, "Thil dang teh vak a awm hran lo, goal ka khung vanga fans lawm lutuk hmel hmuh kha a nuam, an lam ka han hawi chhoh khan hriatreng tawh tura thlalak ka duh a ni," tiin a goal khung a lawm dan a sawifiah.
Buaina?
TV lamah chuan a lang tawh lo, mahse press room lakah manager pahnih Luciano Spalletti leh Max Allegri te chu an intibuai zui nia sawi a ni a, buaina lian leh langsar erawh a thleng chhunzawm lo thung.
Napoli manager Spalletti chuan, "Juve lakah hian ka chak lo hnem tawh, tunah chuan zirtirna pakhat kan han pa ve zauh a ni. Inkhelh ban khan Allegri kha chibai ka tum a, mahse a duh lo, a kal nghal daih," tiin a sawi.
Spalletti naute hian match thumah hnehna an chang vek a, point kua hmuin hmahruaitu an ni. Chutihrualin nizan khan Lazio, Inter Milan, AS Roma, AC Milan leh Fiorentina te an inlan a, anni team panga hi a chung bera lawn thei vek an la ni.
Chak lo mah se Juventus manager a la zam lo. Allegri chuan, "Match hmasa lamah kha chuan kan khel ṭha lo, tuna kan chak loh chhan erawh tihsual tlemte vang chauh a ni. Champions League kan khelh tur hi season thar bul ṭan thar nan kan hman theih ka beisei," a ti. Thawhlehni zanah UCL khel turin Malmo an lenchilh ang.