A tak rama mang ram chentu Lukaku
"Hei hi a ni kum 11 ka nih aṭanga ka lo mangphan ṭhin chu. He hun tawng tur hian ka thawkrim takzet a ni," tiin Chelsea striker Romelu Lukaku-a'n Stamford Bridge-a goal a khung zawhah a sawi a, Blues khelmual ngeia Chelsea tana goal khung chu duhthusam thleng dik a ni - a tan chuan.
Chelsea hian Inrinni zan khan an mikhual Aston Villa chu 3-0 in an sawp a, Lukaku chuan goal hnih a khung bakah Mateo Kovacic chuan goal khat a khung ve bawk a, Blues-in match li an khelh aṭangin point 10 an nei ta.
Kum 28 mi Lukaku-a'n Chelsea a pan hnuah league match thum a khelh aṭangin goal thum a khung tling ta der a, Chelsea ṭantu ni chunga seilian striker hi a mang ramah a cheng mek.
Thawnthu hlui
Lukaku-a'n kum 2011 khan Anderlecht aṭangin Chelsea a zawm a, a naupan lai aṭanga a club ṭan em em a nih avangin a duhthusam ram chu a thleng dik taah a ngai.
Mahse, Belgian striker tan mangchhia inṭanna zawk a lo ni a, Chelsea-a a hun hmasaah hian match 15 chiah khelin goal a khung lo. Lung kim lo tak chungin Stamford Bridge-a chhuahsan a, Everton a zawm.
Big Rom tih hming lem an pek striker hian Everton-ah nasa takin a hming a chher a, Manchester United a pan zui. Red Devils tan match 96-ah goal 42 khung mah se lawm a hlawh ngai lo a, kum 2019 khan Inter Milan a pan.
Thawhlehna chu
Lukaku-a'n Inter Milan a pan hnuah season hnih chhungin match 95-ah goal 64 a khung a, Serie A nomawi a chawipui bawk. Nipui transfer-ah Italian club-in 'khawih thiang lo' ti mah se Chelsea an inlan sek a, an ṭang zo lo.
Belgian striker hian Chelsea-a kir hi a châk hrim hrim a, naupan laia a club ṭan a nihna piahlamah a hun hmasaa a tih hlawhtlin theih loh hlawhtlintir a duh a, tunah chuan Stamford Bridge-ah goal a khung ta.
Lukaku goal hmasa luh nana Kovacic-a 'assist' chu ball ṭha bik a ni a, Belgian striker hian Villa defender Axel Tuanzebe a bum 'thluk' leh zet hnuah minute 15-naah inkkhela goal hmahruai a khung - Chelsea badge a fawp zui a, a hlim tih hai rual a ni lo.
Chelsea an vannei
Blues ṭhatzia an sawi fo ṭhin a, Villa lakah an vannei tel tih erawh zep rual a ni lo. Mikhual team Villa hi goal an chhuah hnuah an harh zawk a, goalkeeper pahnih zingah Blues si ban nghaktu Edouard Mendy chu hna ngah zawk a ni.
Goal an chhuah hnu lawkah Ollie Watkins chuan Villa tan si phurh sutna remchang nei mah se Mendy chuan ṭha zetin a dang a, Watkins hian a chance neih vawi hnihnaah Mendy bum fel tawh mah se ball a ken rei hret avangin Thiago Silva a inrawlh hman a, England tana striker a nih phak loh chhan a lang.
Villa tana Mings-a shot ṭha tak chu Mendy hian a dang leh bawk a, a per lehlam Ezri Konsa-a 'shot' pawh ṭha zetin a dang - Lukaku-a'n goal a khung a, Chelsea chhanhimtu erawh Mendy a ni.
A tawpah a ṭha zawk
Villa-in an chance neih an chhawr theih loh laiin Chelsea erawhin an chance neih an hlah lo. Minute 49-naah Mings-a'n ngaihtuah lo takin keeper a back pass, hemi nangchingtu Kovacic chuan harsatna nei loin goal-ah a lo chantir.
Mikhual team Villa-in hun tam zawk chu Lukaku an dah ṭha thei a, mahse, Belgian striker hian player class tih dan angin a chance neihah goal a khung ve ve - hun pek belhah captain Cesar Azpilicueta ball siamsak chu goal-ah a thlawh lut a, 3-0 in Blues an chak.
Villa-in an chak loh chhanah Argentina tana an fehchhuah avanga inkhunghrang mek goalkeeper Emi Martinez leh winger Emi Buendia an chhawr theih loh chu an chhuanlam thei a, mahse, an chance neih an chhawr miau loh avangin an hun ṭha neih bawhpelh ve lo Chelsea-in chak an phu zawk.
A harsa dawn
Chelsea an chak a, hlim ber thlan tur ni se Lukaku chu thlan tlak a ni. Belgian striker chuan, "Ka career ṭantirah tluk leh din ka fawm a, mahse, tun hnai kum thum chhung chu ṭha takin ka khel tluang ta.
"Season kan ṭan ṭha viau a, mahse, theihtawp kan chhuah chhunzawm a ngai a ni. Team tam takin league nomawi chawi an duh dawn a, inelna a hautak dawn tih kan hria a ni," a ti.
Premier League-ah Chelsea bakah Manchester United, Manchester City leh Liverpool chu champion tum 'ngam' an ni a, Tottenham Hotspur, Arsenal leh Leicester City an la awm bawk avangin he league hi a la ngaihnawm dawn chauh niin a lang.