City-in phuba an la

Community Shield-a an ngam loh hnuah Manchester City-in Leicester City ngam loh nawn an duh lo a, Inrinni zan khan khualmualah Foxes hi 1-0 in an hneh - league match thum chu a zawnin an chak ta.

Mikhual City tan Bernardo Silva chuan inkhela goal awmchhun hi a khung a, King Power Stadium-ah Leicester-in a chhanletna tur an neih theih loh avangin an tlawm.

Inkhel ṭantir aṭangin team pahnihin chak an tum ngam a, a hmuhnawm hle - Manchester City tan goal a luh hmain keeper Ederson chuan Harvey Barnes-a goal khungna remchang chu ṭha takin a dansak.

City-in hrem theih dinhmuna ding hman Ederson an chhawr thei hi an lawm khawp ang - third choice keeper Scott Carson ding ngat se inkhel result a danglam mai thei.

Barnes hian chance duhawm dang a nei nawn a, mahse, uiawm takin bar a tauh per. City tan Gabriel Jesus chuan chance duhawm vawi hnih a nei ve bawk a, mahse, Brazilian striker vanneih zan a ni lo.

Ederson hian bench aṭanga luhtir, Leicester player Ademola Lookman goal khung tur a dang bawk a, a khel ṭha takzet.

Foxes keeper Kasper Schmeichel-a'n goal chhuah 'bik' mah se Jesus goal khung tur pahnih chu ṭha zetin a dang a, fak tlak a ni - minute 62-naa Silva goal khung erawh dan a harsa.

Joao Cancelo-a shot chu Foxes defender Caglar Soyuncu chuan a lo dang per a, a per lehlam changtu Silva hian hnai set sawt aṭangin a pet goal - Schmeichel tan tih theih a awm lo.

City tan pound maktaduai 100 man Jack Grealish a hmuhnawm chhunzawm a, Foxes-in hnehna chang zo lo mah se lawmna tur tam tak an nei tel ve tho bawk.

Nipui transfer-a lakluh Ryan Bertrand leh Jannik Vestergaard te chu hliam vanga an inlan theih loh reng hnuin tun season Premier League-ah a vawi khat nan bul an ṭan a, Jonny Evans chu bench aṭanga lutin a lo kir ve leh ta bawk.

Player thar Lookman-a'n hmabak a nei êng tih a pholang bawk a, kum 23 mi winger hian Ederson a enchhin bakah a shot ṭha tak chu City defender Ruben Dias chuan a lo dang hman.

Leicester hi league match li khelh tawhah vawi hnih an tlawm fel ta der a, mahse, an khelh dan enin Brendan Rodgers-a enkawl team hi an ngaihtuahawm lo.