2021 FIFA Futsal World Cup khel ṭan

Tunlai infiamna khawvela ngaihven hlawh thar futsal inelna lian 2021 FIFA Futsal World Cup chu nizan aṭang khan khelh ṭan a ni a, he thu buatsaih a nih lai hian result kan hre hman lo.

Lithuania chuan he inelna hi a thleng a, team 24 inelna hi October 3 thlenga neih tur niin khawpui pathumah inelna hi neih tur a ni ang.

Asia khawmualpui aṭangin Iran, Japan, Uzbekistan, Thailand leh Vietnam chu inelnaah hian an tel a, Asia aṭangin ram pangain inelna an hmachhawn - Europe (6) tih loha inelnaa ram thawh hnem ber an ni.

Group ṭhen dan
Team 24 hi group parukah team pali zel awmin ṭhen hran an ni a, an inkhelh kual vek hnuah group tina a sang pahnih chu last 16 khel turin an tling ang a, pathumna ti ṭha paliin an zawm ve leh ang.

Round of 16 hi September 24-ah khelh zawh tur a ni a, September 26-27 ah quarterfinal khelh ṭan a ni ang. September 29 leh 30-ah semifinal khelh a ni ang a, October 3-ah final leh pathumna zawnna inkhel a awm ang.

Nizan aṭang khan group stage match khelh ṭan a ni a, inkhel pali a awm a, he thu buatsaih a nih lai hian result kan hre hman lo.

Team tel
Africa aṭangin Angola, Egypt leh Morocco an tel a, CONCACAF aṭangin Guatemala, Panama leh USA an tel - heng khawmualpui pahnih hian team pathum ve ve an thawh tihna a ni.

Football thiam khawmualpui CONMEBOL (South America) aṭangin Argentina, Brazil, Paraguay leh Venezuela an tling a, OFC (Oceania) aṭangin Solomon Islands an tel ve bawk.

UEFA hnuai aṭangin Lithuania chu inelna thlengtu an nih angin an inlan dawn a, anni bakah hian Kazakhstan, Portugal, Russia, Spain, Czech Republic leh Serbia an tel ang.

Beisei sang
Inelna hmachhawn zingah Brazil bawk chu champion tura beisei langsar an ni leh dawn a, anni hi Futsal World Cup-ah vawi nga (1989, 1992, 1996, 2008, 2012) champion tawh an ni.

Kum 2016 champion Argentina thai bo an harsa a, champion lai an nih miau avangin inrintawkna nen Lithuania an pan dawn. Spain hian 2000 leh 2004-ah nomawi an lo chawi ve tawh bawk avangin an zam lo tawp ang.

Asia khawmualpui aṭanga tel zingah Iran chu Futsal World Cup-a boruak lo hip sang tawh ber an ni a, kum 2016 khan pathumna an lo ni tawh - champion tur meuha dah erawh an harsa.

Stadium chhehvel
Inelna hi khawpui pathum Vilnius, Kaunas leh Klaipeda-ah khelh a ni dawn a, stadium pawh hi pathum bak hman a ni dawn lo.

Stadium pathum zingah final khelhna tur Žalgiris Arena chu mipui len hnemna ber a ni a, euro maktaduai 50 senga sak indoor stadium-ah hian mipui 13,807 an leng.

Vilnius khawpuia Avia Solutions Group Arena-ah mipui 10,000 an leng a, mi len tlemna ber Švyturys Arena-ah mipui 6,200 an pungkhawm thei thung.