Zverev tan nghah rih a la ngai

Olympic champion meuh ni tawh mah se Alexander Zverev tan Grand Slam nomawi chawi tur chuan nghah rih a la ngai. German star hi Novak Djokovic hneh loin US Open semifinal-ah a tla.

Zirtawpni zan semifinal inkhel hmuhnawm takah Zverev leh Djokovic an inkhel tawk takzet. Mahse, set nga an khelh zawh meuh chuan rilru paukhauh leh tawnhriat nei ṭha zawk Novak chu 4-6, 6-2, 6-4, 4-6, 6-2 in a chak.

Tokyo Olympic-ah khan Zeverv-a'n gold medal a vaw chhuak a, final kalkawngah seeded pakhatna Djokovic hi a hneh. Tun ṭumah pawh hian chak turin beiseina a nei sang viau, mah se a hmawr a buk fuh leh ta lo.

Kum 24 mi Zverev chuan, "Djokovic-a'n Grand Slam nomawi 20 a chawi tling hi a mak lo, court-a inhmachhawn chiah hian a rilru paukhauh leh huaisen zia chu a takin kan hmu ṭhin.

"Hlawhtling tur chuan rilru paukhauh a pawimawh tih ka zir chhuak thar leh a, chumi chu ka mamawh pawh a ni," tiin a sawi a, engtik niah emaw chuan major title lak ve ngei a inbeisei.

Semifinal lehlamah Daniil Medvedev chuan Felix Auger-Aliassime a hneh ve thung. Nizan khan Djokovic leh Medvedev ten final an khel a, result kan hre hman lo.