Leipzig sawptu Bayern

Bayern Munich-in season liam taa anmahni hnaih bertu RB Leipzig chu Inrinni zan khan 4-1 in an sawp. Bavarians hian September 14, Thawhlehni zanah FC Barcelona hmachhawn turin Nou Camp a tlawh ang.

Red Bull Arena Leipzig-ah Bavarians-in bul an ṭan ṭha a, Robert Lewandowksi-a'n minute 12-naah penalty aṭangin a khung. Second half ṭantirhah Jamal Musiala (47') leh Leroy Sane (54') ten an khung belh a, Leipzig tana Konrad Laimer (58') goal chu mualpho lutuk tur hliahkhuhna chauh a ni a, injury time-ah Eric Maxim Choupo-Moting hmangin Bavarians-in an khung belh.

Bayern-in Leipzig aṭangin manager Julian Nagelsmann, defender Dayot Upamecano leh captain Marcel Sabitzer te an chhuhsak a, tuna an inthlau ta hret hi a mak hran lo.

Nagelsmann-a'n a theihna a lantir chho a, Sane chu mual vei lamah dahin Manchester City winger hlui hi player ṭha zawk a ni tawh. Kum 18 mi Musiala-a'n goal a khung ringawt lo a, Bayern-ah hmun pawimawh a chang pha. Chutihrualin Hansi Flick-a'n Germany tana rim taka chhawr Joshua Kimmich leh Leon Goretzka te erawh an khel ṭha tawk lo a, an chau ve deuh pawh a ni thei ang.