Match li chak zawn PSG

Lionel Messi leh Neymar te chhawr lo chung pawhin Paris St-Germain an chak zel. Paris club hian Inrinni zan khan Ander Herrera-a goal hnih bakah Kylian Mbappe leh Idrissa Gueye te goal hmangin Clermont 4-0 in an sawp.

Mauricio Pochettino naute hian Ligue 1 match li an khelh tawhah an chak vek a, point 15 hmuin hmahruaitu an ni. An chesual viau a nih ngawt loh chuan Lille lak aṭangin league nomawi an chhuhsak let theih ngei a rinawm.

Donnarumma a inlan
AC Milan keeper duhawm ni ṭhin, Euro 2020 best player ni thei goalkeeper Gianluigi Donnarumma chuan PSG tana a match hmasa ber a khel a, goal chhuah loa hun a hmang thei kha lawmna tur a ni ang.

Kum 22 mi Donna-rumma chuan, "Eng inelna leh khawi hmun pawh ni se match hmasa ber hi chu a danglam bik ṭhin. A bik takin Paris khawpuia fans ṭhahnem tak hmaa inkhelh chu a nuamin a ropui hle," tiin a sawi.

PSG hian Keylor Navas an neisa a, nipui bazara an lakluh Donnarumma hi league match hmasa lamah a inlan har chhan pawh a ni. Manager Poch-a'n a keeper pahnih hi engtiangin nge a chawr dawn hriat a la ni lo.

Hmabak UCL
World Cup qualifier khelh vangin Messi, Angel di Maria leh Neymar an la inlan lo a, South America aṭanga Paris pan hma bik Marquinhos erawh a inlan thei - Nilaini zana Champions League an khelh hunah chuan player ṭha an inlan kim thei ang.

Pochetino chuan, "Kan khel ṭha, hmasawnna tur lai chu la awm mah se international break zawh chiah match khelh a nih avangin a awlsam lo lai chu awm ve tur a ni. Tunah chuan Belgium rama UCL khel turin kan inbuatsaih chhunzawm ang," a ti.

Arab sum hmanga siam len PSG hian an duh ber chu UCL nomawi an ni a, chumi tur chuan thapui an thawh dawn. An group match hmasa ber atan Nilaini zanah Club Brugge an lenchilh ang.