James-a'n a theihna a pholan a ṭul - Benitez

Everton manager Rafael Benitez chuan a player chhawr duh loh James Rodriguez chu team-ah hmun chan a duh a nih chuan theihtawp chhuah turin a chah a, "Team tana a inpekna leh duhna a pholan hmasak a ṭul a, chu chu a khelhpui leh fan-te pawhin a laka an beisei a ni," a ti.

Colombia attacking midfielder James Rodriguez hian Everton-ah hian kar khatah £90,000 vel a hlawh mek nia sawi a ni a, Merseyside club-a thlem luttu coach Carlo Ancelotti-a'n Real Madrid a pansan leh tak avangin Everton hi chhuahsan tur ang renga sawi a ni.

Mahse, Benitez chuan, "Nipui transfer-ah khan a chhuah dan tur kan ngaihtuah a, club dawrtu pawh an awm. Mahse, an indawrnaah hian ka tel ve lo a, ka hriatchin chu hei zawng hi a ni.

"Dawrna kan dawn kha ṭha se chu financial fair play rules-a kan buaina chinfel nan pawh a ṭha tur a ni a, mahse, kan insiamrem thei ta lo," a ti a, James an kawl takah chuan a ṭha thei ang bera hman an tum thu a sawi.

European top five league-te transfer inkhar hnu khan Istanbul Basaksehir chuan James hi lakluh an tum nia sawi a ni a, Turkey-ah chuan September 8 thleng kha transfer hawn a ni - mahse, kum 30 mi midfielder hian a hnar.

Benitez chuan tun season-a la inlan lo James chungchang sawi chhunzawmin, "James tan hian a inlan theihna tur match kan ngaihtuah hmasak a ngai a, chuta inlan tur pawh chuan a duhna leh tui halna a lantir a ngai a, chutianga a ti a nih chuan team tan player ṭangkai tak a ni thei ang," a ti.

Everton hian zanin dar 12:30-ah Premier League match khel turin Burnley an mikhual dawn a, league match thum an khelh tawhah tlawm la nei loin point sarih an nei mek.