Spurs an tlawm duai duai!

Tottenham Hotspur-in an league match hmasa pathumah hnehna an chang vek a, an lamah goal a lut miah lo - an hneh zingah champion lai Manchester City an tel.

Spurs result ṭha avangin coach Nuno Espírito Santo chu Premier League coach of the month atan thlan a ni a, rin loh taka Harry Kane an chelh bawk avangin Spurs fan-te an phur vanglai tak a ni.

Mahse, Inrinni zanah Spurs thawnthu thlak danglamin a awm a, khualmualah an hneh ngei tura ngaih Crystal Palace chuan Wilfried Zaha (penalty) leh Odsonne Edouard goal hnih hmangin 3-0 in an lo sawp a, inkhelh hmaa league hmahruaitu kha top four pawn lamah an tawlh chhuak zui.

Minute 12-na lek aṭangin Spurs buaina a inṭan a, centre back Eric Dier chu hliam vangin lakchhuah a ngai a, London club tlarhnung an insiamrem a ngai nghal.

First half chhungin goal a lut lo a, second half-ah Spurs tan chanchin lawmawm lo a thleng nawn. Minute 58-naah Japhet Tanganga hnawhchhuah a ni a, kum 22 mi defender hian Zaha leh Jordan Ayew laka a chet dan avangin minute nga chhung lekin yellow card pahnih a hmuh a, hnawhchhuah a ni.

Player tam zawk an nih hma pawha khel ṭha zawk Palace an phur sawt a, minute 76-naah Ben Davies handball vangin penalty an hlawh chhuak zui.

Zaha chuan penalty hi harsatna awm loin goal-ah a chantir zui a, minute 84-naah Edouard khung tur a siamsak zui - Palace striker thar Edouard hian a club thar tana a match hmasa bera goal khung tur hian khelmualah second 28 bak hun hman a mamawh lo.

French forward hian Premier League-a a match hmasa berah inthlahrun a tum lo - hun pek belh minute thumnaah khel ṭha em em Conor Gallagher-a siamsak chu a goal hnihna ni turin a khung leh a, 3-0 in Palace an chak.

Kum 23 mi Édouard hian transfer tawp niah khan Celtic aṭangin Palace hi pound maktaduai 14-in a zawm a, kum li chhung atan contract a ziak - bench aṭanga a luh aṭanga second 28-a a goal khung kha Premier League-a an match hmasa ber khel player-in goal an khung ran ber record a ni.

Palace hian nipui transfer lai khan Arsenal aṭangin Eddie Nketiah lakluh an tum a, mahse, Gunners-in a man an chhiar to avangin Édouard lam an hawi a, an tisual lo tih an inhre tawh ang.

France tan age level hrang hranga inlan tawh striker hian Celtic-ah match 179 khelin goal 89 a khung a, assist vawi 39 a nei bawk - a kum a la naupan bawk avangin hmabak a nei êng hle.