US Open ; US khawpuiah Russian tlangval a champion

United States tan chuan New York khawpui tluka hlu leh chhuanawm dang a awm thei tawh chuang lo, an khawpui hmangaih leh ngaihhlut em em maiah chuan Russian tlangval Daniil Medvedev-a'n US Open nomawi a chawi.

Pathianni zan final hmuhnawm takah seeded pahnihna Medvedev hian world number 1 Novak Djokovic chu 6-4, 6-4, 6-4 in a hneh. Serbian star Djokovic tan Grand Slam champion hnem ber ni tur chuan tournament dang a nghah leh rih a ngai dawn.

Russian player zingah chuan Maria Sharapova (2006) hnu lamah Medvedev hi Grand Slam champion ni leh thei hmasa ber a ni a, major title a lak hmasak ber a nih bawk avangin amah leh Russian mipuite tan a hlu zual ngei ang.

A hun a thleng
Player ṭha bik zinga mi, mahse inelna liana hlawhtling hleithei lo zinga mi chu Daniil Medvedev a ni. Tun hmain US Open leh Australian Open final a khel tawh a, mahse a chak lo - US Open final a khelh hmasak zawka a hneh loh chu Djokovic hi a ni.

Hard court hi a inkhelh thiamna hmun ni mah se rin a hlawh hleithei lo. Tun ṭumah pawh hian rin hlawh ber a ni meuh lo, mahse nomawi a chawina kawngah hian set khat chiah a hloh a, player ṭha ber Djokovic lakah pawh a buai eih lo.

Serbian tlangval hneh turin Medvedev hian darkar hnih leh minute 16 bak hun a mamawh lo. Set khatna bikah phei chuan first-serve vawi 15 a neih dik aṭangin point a hmu vek a, break point a hmuhtir eih lo, set hnuhnung pahnihah pawh a service ṭum khat chauh a hloh.

Kum hnih liam ta mai khan Arthur Ashe Stadium-ah hian final boruak sang takah Medvedev hian Nadal a hneh lo, set nga an khelh hnuah hrilhhai takin a awm. Tun ṭumah erawh a tawpah a nui zawk a ni ta a, kum 25 mi a nih tawh avangin a champion hnuah pawh a puitling tawh tih a hriat.

A mak zawk
Roger Federer, Rafael Nadal leh Djokovic te an awm miau avangin player dang tan Grand Slam beiseina a tlem, kawng chu awm ve mah se hawnsak an ni meuh lo - harsa leh chep tak karah Medvedev a rawn chawr chhuak ta.

Medvedev chuan, "Tournament kan khelh chhung khan tun ang hun hi ka tawng ang tih ka suangtuah ngam lo, mahse a takin a lo thleng ta si. Inkhel entuten min lo au phur ṭhin a, anni tel lo chuan Grand Slam champion nih hi a theih loh tluk a ni hial ang.

"Chutih rualin Novak-a'n record a siam lai en tuma kalte beiseina ka tithlawn tih ka hria, ngaihdam ka dil. Tawp chin nei loa min thlawp tlattu ka chhungte, team leh ṭhiante chungah lawmthu ka sawi, anni hian ka beidawn lai pawhin min chelh reng," a ti.

Medvedev chungchang sawiin Djokovic chuan, "Tunah hian Grand Slam champion phu an awm a nih chuan, nang ngei hi i ni ang. Title dang pawhin a la zui ngei ang che," tiin a hneh loh Russian tlangval chu champion phu zawk a nih thu a sawi ve bawk.

Nghah a la ngai
Tennis season kal laiah Australian Open, French Open leh Wimbledon a la vek a, amah el phak leh hnaih phak pawh an awm lo. Tokyo Olympic awm kum a nih avangin mipa player zinga a hmasa ber turin 'Golden Slam' a beisei ngam.

Mahse, Japan khawpuia inelna neihah Alexander Zverev a hneh lo, a thil tum hmasa zawk a thlawn phawt. US Open champion a nih chuan 'Calendar Grand Slam' a la ni thei dawn tho, beiseina sang tak nen US lam a pan.

Federer leh Nadal bakah champion lai Dominic Thiem an inlan loh avangin Djokovic beiseina a sang zual. Amaherawhchu, semifinal-a Zverev hneh turin vanneihna a mamawh tel a, final an khelh zui meuh chuan kum 34 mi hi a che hleithei tawh lo.

Grand Slam champion hnem lamah Federer, Nadal leh Djokovic te an la intluk tlang zel, title 20 ṭheuh an nei. Season tharah Australian Open aṭangin an ṭan thar leh dawn, January thla a khelh tur hi Djokovic inkhelh thiamna hmun a ni.

Ka lawm e
A mize danglam tak avangin hriat a hlawh a, midang ti hlim thei tak a ih rualin a mize lawm lo tu pawh an tam. Season hmasa US Open aṭanga an disqualify danah phei chuan Novak hian dem a hlawh, kuminah erawh a beisei aia thlawpna a dawn ṭhat thu a sawi.

Arthur Ashe Stadium-a inkhel entuten Djokovic an ṭan hle a, a chet fuh deuh lai phei chuan thawm a ṭha thei hle. Serbian tlangval chuan, "A chak lo zawk chu ka ni ngei mai, mahse tunah hian khawvela mi hlim ber ka ni hial ang.

"Hetiang ang em ema thlawpna ṭha hi New York khawpuiah ka la dawng ngai lo, min thlawpna leh min ṭanna vangin lawmthu ka sawi takzet," a ti a, tunah chak lo mah se season tharah huaisen takin a lo kir leh ngei ang tih a sawi ngam.