Goal thum khungtu Liverpool lawm a kim lo
Liverpool ṭantuten tun season-ah Liverpool tak tak an hmu leh ta - tlarhnung a nghet a, goal khung chu an tan nuam tawlna ang mai a ni.
Pathianni zan Premier League-ah Reds hian 3-0 in Leeds United an hneh a, khualmualah heti zat goal nen hian chak mah se Harvey Elliott hliam vangin an lawm a kim lo thung.
Kum 18 mi Elliott hi Pascal Struijk-a'n a tlawhna lamah a kerekah a inhliam a, a chawlh rei zawng tur tarlan ni lo mah se zai a nih dawn avangin a chawlh rei a rinawm.
Mohamed Salah chuan Premier League-a a goal 100-na khungin Reds tan goal hmahruai a khung a, Fabinho leh Sadio Mane ten goal khat ve ve an khung bawk.
Salah = 100
Leeds leh Liverpool inkhel tur a nih avangin goal a luh tam rinna a lian sa a, Elland Road-ah inkhel hamrik a rik rualin inkhel a hmuhnawm nghal. Liverpool-in goal khung turin an nghak rei lo.
Minute 20-na lekah Trent Alexander-Arnold-a ball cross ṭha tak chu Salah-a'n hmahruaina goal ni turin a chhuih lut a, Premier League-a goal 100 a khung tlinna chiah a ni.
Salah hian English top flight league-a goal 100 khung tling tur hian match 162 chiah a mamawh a, Premier League-a goal 100 khung tling tura ani aia match mamawh tlem chu Alan Shearer (124), Harry Kane (141), Sergio Aguero (147) leh Thierry Henry (160) te chiah an ni.
Egyptian forward hian goal 100 zinga goal 98 hi Reds tan league match 149 a khelh aṭanga a khung a ni a, Chelsea tana a khelh laiin league match 13-ah goal hnih a lo khung tawh bawk - tun season-ah league match li khelin goal thum a khung leh der tawh!
Goal & hliam
Elland Road-ah mualneitu aiin mikhual team an tlangnel zawk a, minute 50-naah Liverpool-in an goal hnihna an khung zui - goal khung khat ve tak Fabinho chuan Leeds defender buai nuai karah a pet goal a, chak tur a chiang tawh.
Mahse, minute 10 pawh a liam hman lo, chanchin lawmawm loin Liverpool a deng zui. Struijk-a'n a tlawhna avangin Elliott a vial tawp tawp a, a bula awm Salah-a'n mangang takin medical team lam a ko.
Liverpool player leh Jurgen Klopp-a hmelah hlauhthawnna a khat a, a hliam hi a 'serious' tih hrilh nawn kan ngai lo. Damdawi inah kalpui nghal a ni a, chhuak leh tawh mah se zai hmabakin a awm mek.
Klopp chuan, "A tel loin kan inkhel ang a, top player a nih avangin nghakhlel takin a lo kir hun kan thlir bawk ang," a ti a, Liverpool chuan thuchhuah siamin Leeds General Infirmary (damdawi in) chungah lawmthu an sawi bawk.
Player 10 & goal
Elliott hliamtu Struijk hnawhchhuah a ni a, Liverpool-in minute 30 chhung chu player tam zawk ni chungin an khel - an goal thumna hmu tur erawhin an nghak rei a, a bik takin Mane-a'n a hlah hnem hle.
Liverpool-in 1-0 a hma an hruai laia goal ruak zawna a pet over-te chu Mane 'form' lohzia pholangtu a ni a, a hma a sial hret em aw, tih turin midang ball pek turah a keng rei hret ṭhin bawk.
Hun pek belh minute hnihnaah erawh Mane a vannei ta nge nge a, Thiago Alcántara ball pek chu mawi taka a inher kualpui hnuah goal-ah a khung - Senegalese forward hi a la 'class' reng tih hmuhtirin kan awm.
Leeds-in goal khungna hun nei lo tawp an ni bik lo. Mahse, Rodrigo chuan 0-0 a nih laiin a chance chu Alisson hmaah holam takin a hlah a, Patrick Bamford-a'n Brazilian keeper tlanchhuah lai remchang hmua a pet goal lohte chu uiawm a tling bawk.
Kawng engkimah kan tluk lo a, kan tih tur kan tih tawk loh avangin result kha kan phu a ni. An ruahman angin an forward-te an rawn vul a, kan ruahmanna a hlawhtling ve ta lo thung. Elliott inhliam kha pawi ka ti a, khatiang hliam kha chu tupawhin tuar lo se ka duh a, rawlthar player tawrh atan chuan a na lehzual a ni. Ka player khan a ti lui lo tih ka hre bawk. - Marcelo Bielsa, Leeds United coach
Harvey inhliam hma zawng kha chuan kan khel ṭha em em a, mahse, thil thlengin min ṭhawn em avangin kan game pangngaiah kan let thei lo a, kha chu a awm ve rengah ka ngai a ni. Kan phak china a ṭha thei ang berin Leeds lakah khan kan khel a, game hautak khel tura inpeihsa kha kan tih tur chu a ni. Fans karah inkhel hmuhnawm kan pho chhuak a, chak kan phu. - Jurgen Klopp, Liverpool manager