Mizo fighter-in medal rawn hawn

Indian Open MMA Amateur Championship neih zawh takah Mizo tlangval Zarmawia chuan gold medal a rawn hawn a, lightweight category (-70.3 kgs) a inlan fighter hi International Mixed Martial Arts Federation (IMMAF) MMA Championships-a India aiawh turin thlan nghal a ni.

Indore, Madhya Pradesh-a neih inelnaah hian Hunthar tlangval Joseph Vanlalhruaia chuan strawweight category (-52 kgs) ah bronze medal a la ve bawk a, featherweight-a inlan George Lalmuanawma erawh round khatnaah a vanduai thung.

Hmarchhak aṭanga MMA fighter tel zingah Mizoram chiahin medal an hlawh chhuak a, State leh UT 30 aṭanga fighter fuankhawm kara Mizo fighter result hi a chhuanawm hle. Chite tlangval Zarmawia hi November thlaa MMA World Championship, Kazakhsthan-a khel turin a inbuatsaih nghal ang.

IMMAF hnuaia neih tur inelna hi MMA professional company-ten fighter tur zawn nan an hmang ṭhin. Zarmawia hian kum tira national championship-ah khan welterweight (-77kgs) ah fight hmachhawnin gold a la tawh a, tun ṭumah hian a rihna tihniamin lightweight-ah a inlan a, gold a la leh - amateur MMA-ah tlawm a la nei lo.

Zarmawia hi quarterfinal a khelh zawhin a kiu ruh a dawk a, a nak ruh a auh bawk - semifinal a khelh theih rin a nih loh hnuah a hmachhawn zui a, a tawp a thleng a, gold medal a hlawh chhuak.

Mizoram State Mixed Martial Arts Association (MISMA) chuan boruak a ziaawm veleh MMA State Championship, MMA North East Championship leh fight night te Mizorama huaihawt an tum thu an sawi.