Champions League khelh ṭan a ni dawn ta ; Barcelona Vs Bayern Munich

Europe-a club football inelna sang ber UEFA Champions League chu zanin aṭangin khelh ṭan a ni dawn a, football hmuhnawm chhawp chhuah a ni dawn. Zanin dar 12:30 hian Nou Camp-ah Barcelona leh Bayern Munich te an inkhel dawn a, Spanish club lian leh German champion inkhel tur en hi a châkawm takzet.

Barca leh Bayern te awmna group-ah hian Benfica leh Dinamo Kiev te an awm bawk a, group khat aṭanga pahnih tlang tur a nih avangin zanina Nou Camp-a inkhel tur pahnihte hi last 16 lut tura rinkai chu an ni.

Messi tel lohna
Lionel Messi-a'n Paris Saint-Germain a pan tak avangin Barcelona-in 'football legend' tel loin an khelh a ṭul dawn. Sum vangin khelmual pawnah Catalan club hi an talbuai a, khelmual chhungah erawh Ronald Koeman hoin an che chhe hran lo.

Barca hian kartawpah match an nei lo a, international break hmaa Getafe 2-1 a an hneh chu an match hnuhnung ber chu a ni. Getafe nen an inkhelh ṭum hian Antoine Griezmann pawh a la khel a, tunah erawh French forward hian Atletico Madrid a zawm tawh.

Chutihrualin Catalan club hian loan hmangin Dutch forward Luuk de Jong an lalut a, Ronaldo Koeman hnuaiah hmun pawimawh a chang pha ang em, tih chu Bayern an hmachhawn hunah hian a hriat theih ang.

Barca tan rinrawl tur chu Memphis Depay a ni a, Dutch forward hi ram tana a khelh ṭhat avangin Bayern tan pawh ven uluk a ṭul dawn. Catalan club midfield-ah hian Sergio Busquets, Frenkie de Jong leh Pedri te an awm a, keeper Marc-André ter Stegen a dam tawh bawk avangin team ṭha tak an ni.

German champion
Bayern Munich-in Barcelona an hmachhawn hnuhnun ber chu nikum August thla kha a ni a, Messi leh Luis Suarez te awm lai niin German champion hian 8-2 zetin Catalan club hi an sawp.

Kum khat hnuah thil awm dan a danglam ta hle. Barca-in an mualpho hnuah Ronald Koeman an lalut a, Dutch manager hoin season khat an khel tawh. Bayern pawhin Hansi Flick aiah Julian Nagelsmann an lalut a, an khelh dan phung a dang hret.

Chutihrualin Bayern innghahna chu Robert Lewandowski bawk a la ni a, Polish striker hi chakpui tham a ni. Tun hnaia an khelh dan thlirin Nou Camp-a khelh tur ni mah se Bavarians hi team ṭha zawka ngaih an ni a, amaherawhchu international break-a an player pawimawhte chhawr rim an nih bakah kartawpa RB Leipzig nen match pawimawh an khelh avangin hahdamna hun ṭha an nei lo.

Bayern midfield laia awm Joshua Kimmich leh Leon Goretzka te dinhmunin zanin inkhelah hian nghawng lian tak a nei dawn a, Bavarians rawlthar duhawm Jamal Musiala en bik a sual lo ang. Musiala hi kum 18 mi chauh a la ni chungin Bayern leh Germany tan a ṭangkai tawh hle.

Engtin zel?
Tun nipui bazara Barcelona an talbuai lai khan coach Koeman hi chhuak tura sawi a ni hman a, tunah erawh a cham ta zawk. Koeman chuan, "Ka zarah Barcelona-in hmabak êng tak an nei. Spain-a team ṭha ber nih leh Champions League nomawi kan chawi thei ang em, tih erawh hunin a hril ang," tiin a ṭawng chhuak a, club thuneitute nen an boruak a ṭha lo.

Chanchin lawmawm erawh Nou Camp-ah entu 40,000 an awm thei dawn a, Catalan club tan chanchin lawmawm a tling. Player au phurtu tur an awm hi team tan a lawmawm a, club thuneitute erawh ticket-a sum lakluh tur avangin an lawm zawk hial ang.