Ronaldo hmaah Young Boys

Manchester United chuan Cristiano Ronaldo hoin zanin dar 10:15 hian Stade de Suisse an tlawh dawn a, tun season Champions League match hmasa berah Swiss club Young Boys an hmachhawn ang.

English club hian kartawp inkhelhah Newcastle United 4-1 in an sawp a, inkhelh banah Ole Gunnar Solskjaer chuan, "Cristiano hi kum 36 mi a ni a, Mason hi kum 19 a ni thung. An minute khelh tur zat kan bituk ve ve a ṭul a, kum 36 mi a ni tawh tih hre chungin Cristiano hi kan enkawl a ṭul. Chutihrualin Cristiano danglamna erawh a inenkawl ṭha a, ngai a awh leh hma ang," tiin a sawi.

Juventus aṭanga Man-chester United zawmtu Ronaldo hian Newcastle lamah goal pawimawh pahnih a khung nghal a, Young Boys lakah pawh hian bul a ṭan a rinawm.

Tun dinhmuna Champions League-a goal khung tam ber chu Ronaldo a ni a, goal 134 a khung tawh. Portuguese forward hnaih bertu chu Lionel Messi niin goal 120 a khung tawh a, Ronaldo aiin kum hnihin a naupang zawk.

Man United forward Ronaldo tan Messi aia UCL-a record neih ṭhatna hi vawn him a ṭul a, Young Boys lakah hian goal khung ngei a duh ang.