Mourinho-a'n a match 1000-na chakin a lawm

Minute 90+1 a ni a, hetihlaia AS Roma leh Sassuolo goal dinhmun chu 1-1 a ni. Roma tan rin loh lam aṭangin Stephan El Shaarawy chuan goal a rawn khung thut a, 2-1 a ni.

Lawm avangin Jose Mourinho a tlan kual chiam a, Portuguese coach-in an chak a lawm dan hi hmuhnawm a tling - match 1000-a team a kaihhruaina a ni miau a, a tana hriat reng tur match-a chak zawh loh Mourinho hian a duh lo.

Roma tan Bryan Cristante chun minute 37-naah goal hmahruai a khung a, mahse, mikhual Sassuolo hian minute 57-naa Filip Duricic goal hmangin si phurh an sut - goal dang a lut lo reng a, an in draw dawn emaw tih hnua chak hi Mourinho tan a lawmawm zual bik a ni.

Khawvela coach ropui ber pawl chuan, "Dawt ka sawi char char a, game 1000-na a nih avangin he inkhel hian ka tan danglamna bik a neih loh thu ka sawi fo.

"Mahse, a tak takah chuan tlawm kha ka hlau takzet. Vanneihthlak takin kan chak a, naupang chhia ang maiin kan chak ka lawm ta a nih kha - a chhan maw? kum 58 ni loin kum 12 mi lek ang maia ka inngaih vang a ni," a ti!

Roma tan hian striker Tammy Abraham chuan post a tih per a, keeper Rui Patricio chuan Berardi leh Jeremie Boga khung tur ṭha takin a dang a, Sassuolo substitute Hamed Junior Traore chuan post a tih per ve bawk.

Kum 58 mi Mourinho hian club enkawl hna a thawh hnuah match 1000 a hmachhawn a, vawi 638 chakin vawi 204 draw result a nei a, vawi 158 a tlawm - Roma hi match nga a enkawl tawhah a la chakpui vek.

Portuguese coach ṭawng duh ve tak hian a career-ah Benfica, União de Leiria, Porto, Chelsea, Inter Milan, Real Madrid, Chelsea, Manchester United, Tottenham Hotspur leh Real Madrid a enkawl tawh a, nomawi 25 a chawi - heng zingah hian Champions League (2), Premier League (3), Serie A (2) leh La Liga (1) a tel.