Champion lai Blues hmaah Zenit

Champions League champion lai Chelsea chuan zanin aṭangin nomawi humhim hna an thawk ṭan dawn a, Thomas Tuchel-a hote hian zanin dar 12:30-ah Zenit an hmachhawn ang.

London club hi an squad an chhah ṭhat avangin an hmaa nomawi awm angte chu chawi vek an duh dawn. Romelu Lukaku-a'n bul a ṭan ṭha a, German manager Tuchel hnuaiah Blues tlarhnung a phui ṭha bawk.

Chelsea hian inhliam vangin Christian Pulisic an chhawr thei dawn lo a, N'Golo Kante dinhmun a chiang lo a, player dang zawng an dam ṭha.

Season liam taa left back-a hmun pawimawh changtu Ben Chilwell pawhin khelhna hmun a neih a rinawm a, mipui mit fukna tur erawh goal khung khawl Lukaku a ni ang.

Beglian striker hi a club khelhna ṭhinin a zir tawk loh avangin Champions League-ah goal 13 chauh a la khung a, a êng zawnga thlir erawh chuan goal 13 khung tur hian match kua chiah a mamawh.

Group H-ah hian Juventus leh Malmo an awm bawk a, season bul ṭan ṭha lo Italian club hian Eleda Stadion, Sweden-ah zanin dar 12:30 hian insiamṭhat an tum ve bawk ang.

Cristiano Ronaldo chhuahsan Juve hian league match thum khelh tawhah point khat chiah an la hmu a, manager Massimiliano Allegri chuan Zenit nena an inkhel tur hi bul an ṭan ṭhat lehna tur niin a sawi.