November-ah ISL khelh ṭan a ni dawn

Indian football-a league sang ber leh ngaihhlut hlawh ber Indian Super League chuan season thar atan fixture a tichhuak a, November 19-ah match hmasa ber chu khelh a ni dawn.

Tun season ISL match hmasa berah hian ATK Mohun Bagan leh Kerala Blasters te chu zan dar 7:30-ah an inkhel dawn a, ISL season ṭan zanah hian match khat bak a awm lo ang.

Season hmasa ang thoin league match tam zawk hi zan dar 7:30-ah khelh ṭhin a ni ang a, Inrinni zana match hnih a awmin match hnuhnung zawk chu zan dar 9:30-ah khelh ṭhin tawh tur a ni dawn.

A hma zawng khan ISL-ah zan khata match hnih a awm chuan match hmasa zawk chu tlai dar 5:30-ah khelh ṭhin a ni a, match hnihna chu zan dar 7:30-ah khelh ṭhin a ni.

Mahse, tun season-ah erawh he kalphung hi thlak a ni a, Inrinni zana match hnih a awm chuan zan dar 7:30 leh 9:30-ah khelh tur a ni tawh dawn.

Kolkata derby chu November 27-ah SC East Bengal leh ATK Mohun Bagan ten an khel ang a, Mizote ngaihven NorthEast United chuan Bengaluru FC nen November 20, zan dar 7:30-ah an match hmasa ber an khel ang.

Covid-19 vangin ISL hi Goa-ah bawk khelh vek tur a ni dawn a, Nehru Stadium, Fatorda, Athletic Stadium, Bambolim leh Tilak Maidan Stadium, Vasco da Gama ten inelna hi an thleng dawn a ni.