Hamilton leh Verstappen an chesual
Formula 1 champion lai Lewis Hamilton leh tun season kal laia hmahruai mektu Max Verstappen te na takin an inel zel. Italian Grand Prix-ah driver ropui pahnih hi an chesual a, thil thlen danah an inmawhpuh tawn.
Red Bull driver leh Mercedes car khalhtu an tlan tluan thei lo a, anni pahnih awm loh chu McLaren lamin an chawr - Daniel Ricciardo chu pakhatna niin, a teammate Lando Norris chu pahnihna a ni thung.
Chetsualna
Monza tlan kawng nuam leh mawi takah lap 53 tlan tur a ni a, ni dang ang bawkin Hamilton leh Verstappen te an inum na leh dawn tih a chiang - British GP a tlan ṭum khan a hnung zawka tlan Hmailton-a'n a elpui car hi tai sakin Dutch tlangval in inelna a hmachhawn zui thei lo.
Italian GP-ah Hamilton chu a hma zawka tlan a ni ve thung, a hnunga awm Verstappen-a'n tlan pelh tumin nawr chilh viau mah se kawng a kian duh bik lo. Lap 26-na an tlan laiin Red Bull driver hian hmun awl awm mang loah tlan pelh luih a tum.
A hmaa awm pelh a tumna hi kawng kawi lai a ni a, pit lane aṭanga rawn tlan chhuak hlim Hamilton-a'n kawng a kian lo chungin 225mph zeta chaka tlan chungin a nawr lui a, a elpui Mercedes car chungah tlan lawnin kawng sirah an chhuak.
A thi teuh
Formula 1 carah hian chetsualna thleng palha driver an him nan 'halo' siam a ni. Driver ṭhutna chung zawnah thil kual dah a ni a, hei hian driver lu kha kawng tam takin a veng ṭhin - Hamilton ngei pawhin a him chhan a ni tih a sawi.
World champion vawi sarih ni tawh Hamilton chuan, "Vanduaina karah ka vannei, halo kha awm lo se car khan ka nghawng a delh dawn. Pathian min vennaah ka lawm, thi loa ka la awm hi a lawmawm takzet.
"In tihpalh chu a awm thei, mahse midang car chungah em chuan ka la tlan lawm ngai lo, car awm dan kha ngun takin in en chuan ka lu a delh lo kha vannei tak ka ni," tiin a sawi a, thil thlen danah Verstappen a dem.
A thleng thei
Thil thlen danah Red Bull driver khan a tisual zawk niin a lang, mahse Verstappen chuan, "Kawng min kian duh lo a nih chuan khatiang kha a thleng reng ang chu, kawng kawi hmasa zawkah pawh kan chesual ṭep a, a vawi hnihnaah pawh min kian duh lo.
"A nihna takah chuan pit lane aṭanga a rawn chhuah hnuah line a tlan pel tawh a, inelna pangngai a ni tawh. Mi ṭhenkhat chuan phuba lakna angin an lo sawi leh hman tawh, mahse hei erawh chutiang thil a ni lo," tiin a sawi.
Dutch tlangval hian driver championship-ah point 226.5 hmuin hma a hruai mek a, season kal laiah vawi sarih hnehna a chang tawh - pahnihna chu point 221.5 neitu Hamilton a ni thung, inelna boruak sang leh hmuhnawm kan hmu chhunzawm zel dawn.