Vawi khat nan Bagnaia a chak

Francesco Bagnaia chuan Pathianni tlaia tlan zawh tak MotoGP Aragon Grand Prix-ah hnehna a chang. Italian rider hi Marc Marquez hmaah a thleng a, bike intlansiakna sang berah a vawi khat nan a chak.

Inelna hi a tir aṭanga a tawp thlengin a hmuhnawm, lap hnuhnung pathum chauh a awm tawhah tawnhriat nei ṭha Marquez-a'n a hma a tlan hi vawi sarih ngawt tlan pelh tumin a nawr, mahse a tawp thlengin Ducati rider a ṭang tluan thei hram.

Kum 24 mi Bagnaia chuan, "Hun rei tak chu kan thawkrim em em tawh, a rah chhuah chu kan hmu ta," tiin a sawi. Championship lamah point 161 hmuin pahnihna dinhmun a luah a, a chungah hian Fabio Quartararo chauh a awm.

Aragon Grand Prix-ah Quartararo che ṭha tawk loin pariatna a ni hram a, hmahruaitu a nihna dinhmun pawh a sawh ngheh belh thei lo - chutih rualin point 214 a neih tawh avangin a la sang fal viau.