Benzema a la tar lo; goal nen Camavinga

Pathianni zan La Liga inkhel result chu Real Madrid ṭantute tan chuan chanchin ngaihnawm a tling. Karim Benzema-a'n hattrick a siam a, player thar Eduardo Camavinga-a'n goal a khung nghal a, 5-2 in Celta Vigo an hneh.

March 2020 hnua a vawi khat nan Santiago Bernabeu-ah Real an inkhel leh ta a, an stadium hi sak ṭhat mek ni mah se fans 30,000 zetin a hmunah inkhel an en a, an duh ang tak result nen an haw.

Real-in hnehna an chan avangin league match li an khelh aṭanga point 10 neiin hma an hruai mek a, an elpui zingah Barcelona inlan lo mah se Atletico Madrid chuan 2-1 in Espanyol an hneh a, an elpuite lakah Real an kal fal thei lo.

Hei le Benzema
Bernabeu-a Real kir lehna inkhelah Celta lamin rin loh takin goal hmahruai an khung a, minute lina lekah Santi Mina chuan Real fans a ngawihtir.

Mahse, minute 20 a liam a, Benzema chuan goal khung turin a la rintlak reng tih pholangin si phurh a rawn sut.

Mahse, Celta tan Franco Cervi chuan minute 31-naah goal khat dang a rawn khung leh a, chawlhlawk an hman lai chuan mikhual team lam hian 2-1 in hma an hruai.

Real tan buaina tur erawh a awm lo. Second half ṭan aṭanga minute khatna lekah Benzema chuan si phurh a rawn sut a, minute 87-naah a hattrick siamna penalty hmangin a khung bawk.

Benzema hian Real tan tun season-ah match li khelin goal nga a khung tawh - nipui transfer-a an lakluh theih loh Kylian Mbappé an mamawh rih lo.

Camavinga chu
Benzema hattrick khung karah Vinícius Júnior leh Camavinga (72') ten goal khat ve ve an khung bawk. Kum 18 mi Camavinga hi bench aṭanga luhtir a ni a, Real tana a match hmasa berah goal khung turin minute ruk bak a mamawh lo.

French club Rennes aṭanga Real zawmtu hian goal khung mah se midfielder a nih avangin goal khung fo tura beisei erawh a fuh lo ang. Vinícius hming lam hmaih theih a ni lo bawk.

Carlo Ancelotti enkawlna hnuaiah Brazilian winger hian league match li khelin goal li a khung ta der - Real tana goal a khung hnem ber season-ah match 49 khelin goal ruk a khung a, he record hi a khum ngei dawn niin a lang.

King Carlo hnuaia insiamṭhat tum mek Gareth Bale erawh hliam vangin a inlan thei lo a, Real-a a cham chhungin hliam vangin match 102 a khel tawh lo.

Atletico beiseina
Antoine Griezmann kir lehna inkhelah Atletico Madrid-in chak turin vanneihna an mamawh tel a, hun pek belh minute kuanaa Thomas Lemar-a goal khung hmangin Espanyol chu 2-1 in an hneh.

Mualneitu Espanyol hian minute 40-naa Raul de Tomas-a goal hmangin hma an hruai a, Griezmann hoa bul ṭantu Atletico an hawihai.

Hun tawp nan minute 11 chauh a awm tawh tihah Yannick Carrasco-a 'solo' goal mawi hmangin Atletico-in si phurh an sut ṭhen hram a, team pahnih hian point khata lungawi an zir mai dawn niin a lang hman.

Mahse, hun pek belh minute kuanaah Atletico an vannei a, Carrasco siamsak chu Lemar chuan chakna goal ni turin a khung - match li an khelhah point 10 tho neiin Real nen an point hmuh zat a inang.